Semeytany.kz — Облыс әкімі Берік Уәлидің төрағалығымен өткен әкімдік отырысында жаңа оқу жылына дайындықтың орындалу барысы талқыланды. Баяндаманы облыстық білім басқармасының басшысы Бауыржан Туленов жасады.
Қазіргі таңда өңірдегі 12 мектепте күрделі жөндеу жүргізілуде, оның 5-еуінде жұмыс толық аяқталған. Қалған нысандарды 1 қыркүйекке дейін бітіру жоспарланған. 2025–2026 оқу жылына 133 мыңнан аса оқулық пен оқу-әдістемелік кешен сатып алынып, тамыз бойы жеткізіліп, барлық аудандарға тарату жұмыстары жүріп жатыр. Мектептер маңындағы жол қауіпсіздігін қамтамасыз ету бойынша кешенді жоспар нәтижесінде оқу орындарының 93 пайызы қауіпсіз инфрақұрылыммен қамтылды.
426 білім ұйымының барлығында жылыту мәселесі шешілген: 127 нысан орталық жылуға қосылған, 191 нысан қатты отынмен, 56 нысан электр қазандығымен жылытылады. Жылыту жүйелері мен қазандықтарды жөндеуге биыл 614 млн теңге бөлінді: 85 жобаның 33-і аяқталды, 27-сінде жұмыс жалғасуда. Жиында санитариялық-эпидемиологиялық бақылау департаментінің басшысы Нұржан Ноғайбаев пен құрылыс басқармасының басшысы Шыңғыс Риаханов оқушыларды тамақтандыру мен күрделі жөндеу жұмыстарының барысын баяндады.
Кеңес қорытындысында аймақ басшысы барлық жауапты органдарға нақты мерзім қойды: ғимараттардағы жөндеуді 31 тамызға дейін аяқтау, оқулықтарды 30 тамызға дейін толық жеткізу және мектептердегі қауіпсіздік жүйелерін толық іске қосу тапсырылды. Жұмыстардың сапасы қатаң бақылауда болады.
