Semeytany.kz — Абай облысында 2025-2026 оқу жылына дайындық толық пысықталды. Биыл өңірдегі 304 мектепте 102 мыңнан астам оқушы білім алады. Оның ішінде 10 155 бірінші сынып оқушысының 7 146-сы қазақ, 3 009-ы орыс сыныптарына барады. Ал қабылдау жоспары қазіргі таңда 95 пайыздан асқан.
Оқу үдерісі ҚР Оқу-ағарту министрлігінің әдістемелік нұсқау хаттарына сай басталады: 1-сыныптар үшін – 33 апта, 2-11 сыныптар үшін – 34 апта. Білім сапасын көтеру мақсатында «Келешек мектептері» және «Ауыл мектебі – сапа алаңы» жобалары іске асуда.
Оқулықпен қамтамасыз ету үшін 12 баспамен келісім жасалып, 133 мыңнан астам кітап сатып алынды. Қор жеткізілімі аудандық білім бөлімдеріне таратылуда. Әлеуметтік қолдаудың бір бөлігі ретінде 54 мыңнан аса оқушы мектепте тегін ыстық тамақпен қамтылады.
Алыс аймақтардан қатынайтын балалар үшін 121 елді мекеннен 3 мыңнан астам оқушы арнайы автобустармен тасымалданады. Интернетке қосылу толық жолға қойылып, шалғай мектептерде Starlink жүйесі пайдаланылып жатыр.
Жаңа оқу жылында тәрбие бағыты да күшейтіледі: «Адал азамат» бағдарламасы аясында патриоттық және азаматтық құндылықтарға мән берілмек. Сабақ үдерісіне жасанды интеллект элементтері кезең-кезеңімен енгізіледі. Қыркүйектен бастап барлық мектепте «Жеке қауіпсіздік сабақтары» қайта оқытылады.
