Облыс әкімі Берік Уәли Семей қаласын аралау барысында жергілікті халыққа «ескі көпір» атауымен белгілі автожүк көпіріне арнайы барды. Мұндағы асфальт жабынын ауыстыру жұмыстары 16 тамызда басталған болатын. Ұзындығы 1 шақырымға жуықтайтын жолдың ескі асфальт қабаты алынып, орнына қалыңдығы 6 см жаңа тасты-мастикалық асфальт төселді. Тиісті жұмыстар аяқталып, жол белгілері сызылып, қала тұрғындарының қолданысына берілді.
— Оқушылар каникулға шыққан кезде аспалы көпірге асфальт төсеуді бастағанбыз. Енді, міне, жаңа оқу жылының қарсаңында екінші көпірді де аяқтап, тұрғындардың ыңғайлы жүріп-тұруы үшін жағдай жасап отырмыз. Бұған дейін мұнда жылдамдық сағатына 40 шақырым болса, енді автокөліктер 60 шақырым жылдамдықпен жүретін болады,- деді аймақ басшысы.
Облыс әкімі автожүк көпірінің жанында салынып жатқан жаңа көлік өткелінің құрылысы туралы да айтты. Биыл өткен «Орталық Азия – Қытай» саммитінен кейін ҚХР Төрағасы аймақ елдеріне қайтарымсыз грант берілетінін атап өткен болатын. Аталған көпір құрылысын қаржыландыруды қайтарымсыз грант есебінен шешу жөнінде облыс тарапынан ұсыныс беріліп, бастама Президенттің қолдауына ие болды.
— Үкіметпен, тиісті министрліктермен келісілді. Қаржы бөлінетін болды. Мердігер компания жыл соңына дейін көпірдің бірінші кезеңін аяқтап, көліктердің жүруіне жағдай жасаймыз деп отыр. Яғни, жол ашылады. Асфальт төсеу жұмыстары көктемде басталады. Ал ескі көпір келесі жылы жаяу жүргіншілер көпірі болады. Батыс елдеріндегідей қайта қалпына келтіріп, жаяу жүргіншілерге арналған үлкен көпір, Арбат жасаймыз. Қала әкімдігі жоба ұсынады. Бұл көлік өткелі қала тұрғындары велосипед теуіп, демалып, емін-еркін жүретін орын болады. Шағын сауда орындары орнатылады. Яғни, жаяу жүргіншілер Арбатына айналдыратын боламыз,- деді аймақ басшысы.
Абай облысы әкімінің баспасөз қызметі
