Өңірде «Мерейлі отбасы» байқауының облыстық кезеңі қорытындыланды. Оған Абай облысының барлық аудандарынан отбасылар қатысты. Әрқайсысы – шаңырақтағы татулық пен түсіністіктің, дәстүрлі құндылықтарды сақтаудың жарқын үлгісін көрсетті.
Қатысушыларды құттықтаған Абай облысы әкімінің бірінші орынбасары Ербол Садыр отбасының қоғамдағы айрықша маңызына тоқталып өтті.
– Бүгін баршамыз үшін қуанышты күн. Байқауға қатысушылар – біздің облыстың тұрғындары, әр ауданның өкілдері. «Мерейлі отбасы» – дәстүрге айналған байқау. Отбасы институтын насихаттау – ортақ болашағымыз үшін аса маңызды. Сондықтан, ең алдымен, сіздерді шын жүректен құттықтаймын. Мемлекет басшысы айтқандай, отбасы – ел дамуының кепілі. Сіздердің шаңырақтарыңыз берік те бақытты болсын. Біз бәріміз бірге еліміздің игілігі үшін еңбек етіп, сіздердің өмірлік ұстанымдарыңыз болашақ ұрпаққа үлгі боларына сенеміз, – деді ол.
Байқауға көпбалалы жанұялар, еңбек әулеттері, немере-шөберелері жанын жадыратқан ардақты ардагерлер қатысты.
Комиссия шешімімен облыстық кезеңнің жеңімпазы болып Сыдықбаевтар отбасы танылды. Енді олар өңір намысын республикалық деңгейде қорғайтын болады.
Отағасы Оңғар ата мен жұбайы Тлеугайша Қасымжанқызы сегіз перзент тәрбиелеп өсірген. Бүгінде олар – 16 немере мен 7 шөберенің ата-әжесі.
