Семей қаласының Водный кентінде жаңа үлгідегі 600 орындық №52 мектеп биылғы оқу жылында оқушыларға есігін айқара ашты. «Келешек мектептері» ұлттық жобасы аясында бой көтерген білім ордасының заманауи мүмкіндіктері өте жоғары. Жаңа үлгідегі 3 қабатты мектепте енді оқушылар жаңа бағытта білім алатын болады.
Гүлім ЗАМАНБЕКҚЫЗЫ,
«Semey tany»
Бұл жаңа нысан — Абай облысындағы үшінші, ал Семей қаласында бой көтерген екінші білім ошағы. Бұған дейін Қарағайлы шағынауданында 1200 орындық және Бесқарағай ауданында 300 орындық мектеп пайдалануға берілгені белгілі.
Білім күні мерекесіне орай өткізілген «Мектебім-мейірім мекені» атты нысанның ашылу салтанатына облыс әкімі Берік Уәли, Қазақстанның Еңбек Ері, ұлағатты ұстаз Алма Шүкіжанова қатысты.
600 орындық білім мекемесінде спорт және акт залы, асхана, хореография залы, бастауыш және арнайы пән кабинеттері, STEM-зертханалар, робототехника кабинеті тағы да басқа қажеттіліктермен толықтай қамтылған. Сондай-ақ, мектеп ауласында футбол, волейбол, баскетбол алаңдары мен жүгіру жолақтары да салынған. Оқушылар алдағы уақытта кең ғимаратта ғана емес, озық технологиялармен қамтылған, заман талабына сай білім ордасында білім алады. Басты ерекшелігі бастауыш және орта буын оқушыларының ғимараттары жеке блокта орналасқан. Бұл оқушылардың қауіпсіздігін арттырып, өз жастарына сай тыныш әрі ыңғайлы ортада білім алуға жасалған үлкен мүмкіндік. Әрбір сыныптарда заманауи технологиялармен жабдықталған кабинеттер де бар.
-Ардақты ағайын, құрметті ұстаздар, қадірменді ата-аналар және оқушылар! Мемлекет басшысы Қасым-Жомарт Кемелұлының бастамасымен «Келешек мектептері» ұлттық жобасы аясында көптеген жаңа оқу орындары салынуда. Біздің өңірімізде де бірнеше білім нысандары бой көтерді. Ел ертеңін айқындайтын осындай келелі бастамалар арқылы балаларға қолайлы, қауіпсіз, заманауи білім беру мақсатындағы жүйелі қадамды көруге болады. Соның айқын көрінісі – бүгін Семей қаласының Водный кентінде бой көтерген 600 орындық жаңа мектеп. Бұл – ұстаздың арманын, ата-ананың сенімін, баланың үмітін тоғыстырған ортақ қуаныш. Бүгінгі ашылған мектеп – болашаққа деген сенімнің символы. Баршаңызды жаңа оқу жылының басталуымен шын жүректен құттықтаймын!, – деді облыс әкімі Б.Уәли.
Жалпы, жаңа білім ордасында түрлі пәндер бойынша 28 заманауи оқу кабинеті балалар игілігіне беріліп отыр. Графика және модельдеу бөлмесі, ағаш және металл өңдеу цехтары, аспаздық және тігін шеберханалары да барлық баланы қызықтырары сөзсіз. Оқу процесі үшін 30 интерактивті панель, ноутбуктер, стационарлық компьютерлер және принтерлер орнатылған. Инклюзивті білім беру талаптарына сай ғимарат лифт, пандустар, тактильді жолақтар және арнайы санитарлық тораптармен жабдықталған. Ата-аналар мектептің кең әрі жарық кабинеттерін жоғары бағалап, мұндай білім ошағында балаларының білім алатынына өте қуанышты екендерін жеткізді.
-Немеремнің осы мектепте білім алатынына мен өте қуаныштымын. Себебі, мұнда барлық жағдай қарастырылған. Бастауыш сыныпта болса да алдағы уақытта қолдануға берілген барлық мүмкіндікті игеріп, осы мектептің қабырғасынан білімді де білікті оқушы болып шығатынына сенімдімін. Әр баланың осындай барлық жағынан қамтылған, барлық мүмкіндігі қарастырылған ортада оқығаны бізді қуантады. Осы аталған «Келешек мектептері» бастамасы уақыт өте келе барлық ескі мектептердің орынын басады деп сенеміз»,-дейді Света Тұрдығазықызы. Ал, бастауыш сынып оқушысы Балым Қанатқызы ескі мектептен жаңа білім ордасына ауысып, биылғы оқу жылын осы мектепте қарсы алатынына қуанышты екенін жеткізді. «Мен бұл мектепке ауысып келіп жатырмын. Алдағы уақытта өзіме жақын достар да тауып алармын. Ең бастысы білім алуымызға барлық жағдай жасалған. Бізге осындай мүмкіндік беріп отырған ұстаздарымыз бен ата-аналарымызға алғысым шексіз» дейді Балым.
Жалпы «Келешек мектептері» жобасы аясында өңірде 5 жаңа білім беру нысаны пайдалануға берілмек.
