Семей медициналық университетінде Б. Атшабаров атындағы XVII Халықаралық «Экология. Радиация. Денсаулық» ғылыми-практикалық конференциясы өз мәресіне жетті. Екі жылда бір рет өтетін конференция биыл да жоғары деңгейде өтіп, халықаралық ғылыми қауымдастықтың назарын аударды.
Гүлім ЗАМАНБЕКҚЫЗЫ,
«Semey tany»
Маңызды шараның ашылу салтанатына Қазақстан Республикасының Денсаулық сақтау министрлігінің, Абай облысы әкімдігінің ресми өкілдері қатысты. Сондай-ақ, шетелдік қонақтар да арнайы шақырылып, Семей төрінде бас қосты.
Жапония, Түркия, Қытай, Канада, Ресей және өзге де алыс-жақын шет мемлекеттерден келген ғалымдар, жалпы саны 200-ден астам қатысушы ғылыми пікірталас алаңын толықтырды.
Бұл жолғы жиынның басты ерекшелігі тек Қазақстанның ғана емес, әлемдік деңгейде өзекті саналатын радиациялық қауіпсіздік пен экологиялық ахуал мәселелеріне басымдық берілуінде болды. Қатысушылар радиация зардаптарының алдын алу, халық денсаулығын қорғау, клиникалық медицинадағы жаңа әдістер мен тәжірибелерді енгізу тақырыптарын кеңінен талқылады. Жиын барысында облыс әкімінің орынбасары Қуаныш Әбілтайұлы сөз алып, аймақ басшысының арнайы тілегін жеткізді.
Абай облыстық мәслихатының депутаты, «Полигон-21» комитеті қоғамдық бірлестігінің төрағасы Марат Құрманбай бұл күннің ел тарихындағы маңызына тоқталды.
— Алдымен барша Семей өңірін, Абай жұртшылығын «Полигон-21» комитеті қоғамдық бірлестігі атынан Ата Заңымыздың 30 жылдық мерейтойымен құттықтаймын. Семей ядролық сынақ полигоны өңіріміздегі ең күрделі әрі ауы тақырыптардың бірі екені шындық. Себебі, атом радияциясының зардабын көрген халықты медициналық және әлеуметтік оңалту мәселесі әлі де өте өзекті. Бұл қасірет қаншама мың адамның денсаулығына әсер еткенін жақсы білесіздер. Аймақтағы ағайын оның тауқыметін әлі күнге дейін тартып отыр. Радияцияның ең жағымсыз әсері атадан балаға яғни, ұрпаққа да беріліп отыр. Біздер қоғам белсенділері мен сіздердей ғалымдардың алдында әлі де зор міндеттер тұр. Соның негізгісі — тек радияциядан туындаған зардаппен ғана күрес емес, кешенді қолдау бағдарламаларын жасау. Атап айтқанда психологиялық көмек көрсетіп, өмір сапасын жақсартуға қажетті шараларды қамту,-деді Марат Серікжанұлы.
Осы конференция барысында ғалымдар өздерінің ғылыми зерттеулерін ортаға салды. Нақтырақ айтқанда, радиациялық экология және қауіпсіздік – радиацияның қоршаған орта мен адам ағзасына әсері, алдын алу шаралары, онкология, қатерлі ісіктің диагностикасы мен емдеудегі жаңа тәсілдер таныстырылып, экологиялық қолайсыз аймақтарда халыққа медициналық көмек көрсетудің тиімді жолдары талқыланды. Сондай-ақ, экоортадағы репродуктивті денсаулық пен бала денсаулығы – ұрпақ саулығына әсер ететін факторлар сараланды. Клиникалық медицина мен экология – экологиялық ахуалдың клиникалық практикаға ықпалы сөз болды және хирург пен реаниматолог тәжірибесіндегі сын-қатерлер – күрделі жағдайлардағы шұғыл медициналық көмек тақырыптары көтеріліп, жас ғалымдар секциясы – жас ізденушілер өз зерттеулерін ұсынып, тәжірибелі мамандардан пікір алды.
Сонымен қатар, бұл конференция тек ғылыми жаңалықтарды талқылап қана қойған жоқ, тәжірибе алмасу алаңына айналды.
Жиынға қатысқан жас ғалымдар тәжірибелі ұстаздарынан бағыт-бағдар алып, өздерінің алғашқы ғылыми нәтижелерін сарапшыларға ұсынды. Конференция барысында радиациялық экология мен денсаулық сақтау саласындағы нақты ғылыми деректер ұсынылып, болашақ зерттеу бағыттары айқындалды. Әлемнің түрлі елдерінен келген ғалымдардың бірлескен еңбектері халықаралық ғылыми ынтымақтастықтың дамуына серпін берді.
«Экология. Радиация. Денсаулық» конференциясы – тек медицина саласының ғана емес, бүкіл қоғам үшін маңызды шара болды. Өйткені, экологиялық ахуал мен халық денсаулығы мәселелері әр елдің ғана емес, күллі адамзаттың ортақ мәселесі екені белгілі. Сондықтан мұндай халықаралық жиындар ғылыми қауымдастықты біріктіріп қана қоймай, ортақ шешім қабылдауға жол ашады.
Халықаралық маңыздағы бас қосуға қатысушылар алда да ғылыми байланыстарын нығайтып, жаңа жобаларға негіз қалауға уағдаласты. Қорыта айтқанда XVII Халықаралық «Экология. Радиация. Денсаулық» конференциясы ғылым мен тәжірибенің тоғысқан, әлемдік деңгейде өзекті мәселелердің шешімін іздейтін маңызды алаң болды.
