Semeytany.kz — Абай облысының әкімі Берік Уәлидің төрағалығымен өткен кеңейтілген аппараттық кеңесте «Таза Қазақстан» экологиялық акциясының өңірдегі барысы талқыланып, тазалық жұмыстарын күшейту тапсырылды.
Табиғи ресурстар және табиғат пайдалануды реттеу басқармасының басшысы Марат Теміржановтың мәліметінше, облыста 44 іс-шарадан тұратын жоспар іске асуда. Биылғы санитарлық-экологиялық екі айлыққа 251 мыңнан астам адам, 11 948 ұйым және 7 887 техника жұмылдырылған. Нәтижесінде 146 мың аула, 2 226 саябақ пен сквер, 947 ескерткіш аумағы тазартылып, 49 617 түп ағаш отырғызылған. Сонымен бірге электромобильдерге арналған үш қуаттау станциясы орнатылды.
Экология департаментінің басшысы Серік Сарбасов рұқсат етілмеген қоқыс орындарын ғарыштық мониторингпен анықтау жалғасып жатқанын айтты: 2023 жылы 347, 2024 жылы 266, ал биыл 182 үйінді тіркеліп, көрсеткіш төмендеу үстінде. Облыстық полиция департаментінің жергілікті полиция қызметі басқармасының бастығы Әсет Өтепов акция аясында 7 891 құқық бұзушылық бойынша 71 млн теңгеден астам айыппұл салынғанын жеткізді.
Аймақ басшысы аудан және қала әкімдеріне тазалықты жүйелі түрде күшейтіп, апта сайын сенбілік өткізуді, заңсыз қоқыс үйінділерін дер кезінде жоюды тапсырды. Осы аптадан бастап аппарат пен басқарма қызметкерлерінен құрылған жұмыс тобы «Таза Қазақстан» аясында егілген ағаштар мен екпелердің жай-күйіне мониторинг жүргізеді. «Аудан әкімдері саябақтарды қалпына келтіруді қолға алып, қараусыз қалған аумақтарды жаңғыртуы керек. Ағаш егіліп, қоршаулар орнатылсын. Мұндай жұмыс тек аудан орталықтарында ғана емес, ауылдарда да жүргізілуі тиіс», – деді Берік Уәли.
