Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте Курчатов қаласының даму жоспары, «Ауылдық денсаулық сақтауды жаңғырту» жобасы аясындағы жұмыстар және «Таза Қазақстан» акциясының жүзеге асырылуы талқыланды.
Кеңеске басқарма басшылары мен өңірлік департамент жетекшілері қатысып, аудан-қала әкімдері бейнеконференция арқылы қосылды. Курчатов әкімі Болат Әбдіралиев моноқаланың ахуалы мен алдағы мақсаттарды баяндады: қалада 10 мыңнан астам тұрғын тұрады, олардың 20 пайыздан астамы қала құраушы мекеме – Ұлттық ядролық орталықта еңбек етеді. Қаланың кірісі тұрақты өсім үстінде: 2022 жылы 1,8 млрд теңге, 2023 жылы 2,1 млрд теңге, 2024 жылы 2,5 млрд теңге болып, биыл 3 млрд теңгеге жеткізу көзделген. Бұрын бюджеттің 70 пайызы бір кәсіпорынға тәуелді болса, бүгінде бұл үлес 48 пайызға дейін төмендеген.
Әкімнің айтуынша, 2025–2029 жылдарға арналған жоспарға жалпы құны 1,1 трлн теңге болатын 76 жоба енген. Соның ішінде экономиканы әртараптандыратын 14 жоба, инфрақұрылымды жаңғыртатын 37 жоба және әлеуметтік саладағы 25 жоба қарастырылған.
Қала абаттандыруына да екпін берілуде. «Қазцинк» АҚ демеушілігімен жыл соңына дейін 8 аулаішілік жолға асфальт төселеді. Облыстық бюджет есебінен сүзгі-сорғы станциясына күрделі жөндеу жүріп жатыр. 8 қазандықты ауыстыру және кәріз желілерін жаңарту басталды. Жағалауды абаттандыру, спорт және ойын алаңдарын салу, көпқабатты үйлердің қасбеттерін жаңарту кезең-кезеңімен іске асады.
Облыстық экономика және бюджеттік жоспарлау басқармасының басшысы Роза Құдайбергенқызы Курчатовтың моноқала ретіндегі ерекшеліктерін атап өтті: 2024 жылы салықтық түсім 3,8 млрд теңгеге жеткен, ал қала бюджеті 2023 жылмен салыстырғанда үш есеге ұлғайып, 4,9 млрд теңгені құрады. Балалар шығармашылығы үйі жаңартылып, дене шынықтыру-сауықтыру кешенінің құрылысы жүруде.
Жиын қорытындысында аймақ басшысы Болат Әбдіралиевке әлеуметтік-экономикалық көрсеткіштердің орындалуын, жаңа жұмыс орындарын ашуды жандандыруды тапсырды. Тиісті басқармаларға қаланың даму индикаторларын тұрақты бақылауда ұстау жүктелді. «Курчатовтың әлеуеті зор. Ғылыми база мен жаңа өндірістер ашу инвестиция тартуға, халықтың тұрмыс сапасын жақсартуға жол ашады», – деді Берік Уәли.
