Semeytany.kz — Абай облысында атаулы әлеуметтік көмек (АӘК) алушылар саны биыл төмендеп келеді. Бұл туралы Өңірлік коммуникациялар қызметінде өткен баспасөз мәслихатында облыстық жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбек мәлімдеді.
Қыркүйек айына дейін өңірде 2 436 отбасы АӘК алған. Мектеп жасына дейінгі 3 508 балаға қосымша төлемдер төленіп, жалпы сома 921,1 млн теңгеден асты. «Мемлекеттік қолдау шаралары нәтижесінде көмек алушылар саны азайып келеді. Өткен жылмен салыстырғанда АӘК алатындар 860 отбасына кеміді», – деді басқарма басшысы.
Биылдан бастап учаскелік комиссиялар өтініш берушілердің жағдайын бағалау үшін FSM Social мобильді қосымшасын қолданады. Геолокациямен жабдықталған бұл құрал шешім қабылдау үдерісін жеделдетіп, формалды тәсілдердің алдын алуға мүмкіндік береді.
Сонымен бірге азаматтардың жекелеген санаттарына атаулы әрі мереке күндеріне біржолғы әлеуметтік көмек көрсетіледі. Ардагерлерге, көпбалалы отбасыларға, І және ІІ топтағы мүгедектігі бар азаматтарға төленетін төлемдер жыл сайын ұлғайып отыр. Мәселен, ҰОС ардагерлеріне берілетін төлем 2023 жылы 1 млн теңге болса, биыл 5 млн теңгеге жетті, – деп атап өтті Айман Нұрлыбек.
