Semeytany.kz — 2 қыркүйектен бастап «Семей – Көкпекті – Теректі» бағытында «Mercedes-Benz Sprinter» шағын автобусы жүре бастады. Бұл аудан тұрғындарына облыс орталығына қолжетімді әрі ыңғайлы қатынау мүмкіндігін ұсынады.
Қоғамдық көлік аптасына үш рет—сейсенбі, бейсенбі және сенбі күндері жолға шығады. Аудан әкімдігінің мәліметінше, бұған дейін Көкпекті ауданында маршруттық автобустар мен микроавтобустар тұрақты қатынамаған.
Жаңа бағыттағы жол ақысы 3 мың теңге болып белгіленді. Салыстырсақ, «Көкпекті – Семей» бағытындағы такси құны шамамен 6 мың теңге еді. Яғни, жаңа маршрут тұрғындардың шығынын азайтып, әлеуметтік тұрғыдан елеулі қолдау болып отыр.
Биыл ауданда «Шұғылбай – Көкпекті» бағытында маршруттық «Газель» іске қосылды. Бұдан бөлек, аудан орталығы—Көкпекті ауылында ауылішілік қоғамдық көлік қызметі жолға қойылды. Бұл бастамалар ауылдар арасындағы байланысты нығайтып, халықтың қатынауына қолайлы жағдай жасауда.
