Semeytany.kz — Абай облысының әкімі Берік Уәли Көкпекті ауылындағы Жақия Шайжүнісов атындағы орта мектеп пен «Көкпекті Толағайы» балабақшасының жұмысымен танысты.
1989 жылы салынған мектепте бүгінде 427 оқушы оқиды, 55 мұғалім еңбек етеді. Өткен жылы «Қазақстан халқына» қоры қолдаған «Ауылдық жерлердегі тірек мектептердің әлеуетін дамыту» бағдарламасы аясында білім ордасы күрделі жаңғыртудан өтіп, 27 кабинет толық жаңартылды. Қазіргі таңда кабинеттер заманауи технологиялармен жабдықталған. 55 мұғалімнің 13-і — осы мектептің түлектері. Солардың бірі, «Болашақ» бағдарламасының түлегі Нұрлан Құмарбекұлы туған ауылында математикадан сабақ беріп жүр.
Аймақ басшысы оқу бөлмелерін, кітапхананы, музей мен телестудияны аралап, ұжым жұмысына жоғары баға берді. «Кабинеттер талапқа сай. Оқушыларға жаңа мамандықтардың негізі үйретіліп жатыр екен. Бұл бағытты жалғастыру керек. Мектепке жаңа автобус қажеттігін білемін, бұл мәселе жақын арада шешіледі», — деді Берік Уәли. Ауыл тұрғыны, ардагер ұстаз Ерзат Қилыбаев та мектептің 1989 жылдан бері алғаш рет адам танымастай жаңарғанын айтып, ризашылығын білдірді.
Әкім аудан орталығындағы 1965 жылы салынған «Көкпекті Толағайы» балабақшасына да барды. 2016 жылдан бері жұмыс істейтін мекемеде 95 бала тәрбиеленуде, 33 қызметкер еңбек етеді, барлығы 5 топ бар. 2024 жылы қазандыққа ағымдағы жөндеу жүргізіліп, қажетті жабдықтар толықтырылған. «Мектепке дейінгі ұйымдардың материалдық-техникалық базасын нығайту — басты міндеттің бірі. Мұнда балалар үшін қауіпсіз әрі қолайлы жағдай жасалған, қолдау жалғасады», — деді Берік Уәли.
