Мемлекет басшысы Қасым-Жомарт Тоқаев жақында болып келген Қытайға ресми сапардың нәтижесімен бөлісті.
— Менің Қытайға жасаған соңғы сапарым барысында әлемдік деңгейдегі компаниялармен көпмиллиардтық келісімдер жасалды. Сол компаниялардың бірі жаһандық Shenzhen технополисін салуға қатысқан және ол Alatau City жобасын жүзеге асыруға тікелей атсалысады. Келесі қадам — Alatau City үшін берік институционалдық негіз құру, — деді Қасым-Жомарт Тоқаев Қазақстан халқына Жолдауы барысында.
Осы орайда Мемлекет басшысы 10 күн ішінде қалаға Үкіметке тікелей бағынатын арнайы мәртебе беру туралы Жарлық жобасын дайындау қажеттігін тапсырды.
— Одан кейін алты айдан аспайтын мерзім ішінде қала басқару тәртібі, қаржылық модельдер және өзге де маңызды аспектілерді қарастыратын жеке заң қабылдануы тиіс. Тағы да атап өтемін, арнайы құқықтық мәртебе, бұл артықшылық емес, қағаз жүзінде қалып қоймау үшін қажет міндетті шара әрі құрал. Alatau City — өңірдегі алғашқы толықтай цифрлық қала болуы керек. Smart City технологияларын енгізуден бастап, тауарлар мен қызметті криптовалютамен төлеу мүмкіндігіне дейін. Бұл қала Қазақстанның болашағының бейнесін көрсетіп, технологиялық прогресті өмір сүруге барынша қолайлы ортамен үйлестіреді, — деп толықтырды Президент.
