Semeytany.kz — Бүгін облыс әкімі Берік Уәли Біріккен Ұлттар Ұйымының Даму бағдарламасының (БҰҰДБ) Қазақстандағы тұрақты өкілі Катаржина Вавьерниямен кездесті. Тараптар өңірде бірлескен бастамаларды кеңейту және ынтымақтастықты жаңа деңгейге шығару мәселелерін талқылады.
Катаржина Вавьерния бұл Абай облысына үшінші сапары екенін атап өтіп, өңірде БҰҰДБ-ның өкілдері тұрақты жұмыс істейтінін айтты. Оның сөзінше, тұрғындардың сұранысына сай облыстың төрт ауданында балалар ойын алаңдарын салу, мұз айдынын ашу және қоқыс тастауға арналған құрылғылар орнату сияқты шағын жобалар іске асырылмақ. Сондай-ақ ұйым жаңадан құрылған өңірлерге арналған даму бағдарламаларын әзірлеп жатыр, олар қалаға да, ауылдық аумақтарға да бағытталады. Бүгін делегация Жаңасемей ауданына барады.
Аймақ басшысы Берік Уәли БҰҰДБ-мен әріптестікті жоғары бағалайтынын білдіріп, өңірге арнайы келгені үшін мәртебелі қонаққа алғыс айтты. Ол Семей өңірінің 40 жыл бойы ядролық сынақтардың зардабын тартқанын еске салып, осы және өзге де бағыттарда бірлескен жобаларды жүзеге асыруға дайын екенін жеткізді.
Жоспарланған нысандар бойынша: балалар ойын алаңдары мен мұз айдыны әлеуметтік инфрақұрылымды жақсартып, тұрғындардың бос уақытын тиімді өткізуге жағдай жасайды, ал қоқыс тастауға арналған құрылғылар экологиялық мәдениетті арттыруға ықпал етпек. Қазіргі кезеңде тараптар аталған жобалардың нақты тетіктерін пысықтап, іске асыру кестесін келісіп жатыр.
