Semeytany.kz – Облыс әкімі Берік Уәлидің төрағалығымен өткен кеңейтілген аппараттық кеңесте «Таза Қазақстан» аясындағы тапсырмалардың орындалуы, сондай-ақ автомобиль жолдары мен жылыту бекеттерінің қысқы дайындығы талқыланды.
Жиында облыс әкімі аппаратының басшысы Эльдар Бақпаев сенбілік қорытындыларын және берілген хаттамалық тапсырмалардың орындалуын баяндады. Әкімнің тапсырмасымен облыс әкімі аппараты мен табиғат пайдалануды реттеу басқармасы мамандары өңірде отырғызылған ағаштардың саны мен жерсіну деңгейіне арнайы мониторинг жүргізді. 2025 жылы 65 мың түп ағаш отырғызу жоспарланған. Бұл бағытта Көкпекті, Үржар және Жаңасемей аудандары жоғары нәтиже көрсетті, төмен көрсеткіш тіркелген өңірлерге жұмысты жеделдету тапсырылды.
Өңірде 2024–2029 жылдарға арналған «Таза Қазақстан» экологиялық мәдениетті дамыту тұжырымдамасы бекітілген. Құжат тұрғындардың табиғатқа жауапкершілігін арттыру және экологиялық ахуалды жақсарту мақсатындағы 44 іс-шараны қамтиды. 6 қыркүйекте өткен жалпыоблыстық сенбілікке 14,6 мыңнан астам адам, 591 ұйым және 256 техника қатысып, 6019 аула, 151 саябақ пен сквер ретке келтірілді. 57 су айдыны мен 1074 метр арық тазартылып, 1 мың тоннадан астам қатты тұрмыстық қалдық полигондарға шығарылды.
Қорытындысында аймақ басшысы аудан-қала әкімдеріне тазалық жұмыстарын жалғастыруды, ағаш егу жоспарын сапалы орындауды және қоқыс жәшіктерінің санын көбейтуді міндеттеді. «Ағашты егу бір басқа, оның өсіп-өнуі үшін күтім жасау бір басқа. Бұл мәселеге бей-жай қарауға болмайды. Аппарат көшелердегі санитарлық тазалықтың жағдайына мониторинг жасауды жалғастыруы керек», – деді Берік Уәли.
