Semeytany.kz – Бүгін ҚР Ішкі істер министрінің орынбасары Айдар Сайтбеков Абай облысы Полиция департаментінің жаңа бастығын таныстырды.
Полиция полковнигі Эльдар Нұрланұлы Данияров осы қызметке тағайындалып, ұжымға ресми түрде таныстырылды. Ол бұған дейін Астана қаласы Полиция департаменті бастығының бірінші орынбасары болған. Шараға қатысқан облыс әкімі Берік Уәли жаңа басшылықтың жұмысына сәттілік тілеп, құқықтық тәртіп пен қауіпсіздікті қамтамасыз ету – мемлекет тұрақтылығының басты кепілі екенін атап өтті.
Аймақ басшысы өз сөзінде Мемлекет басшысы Қасым-Жомарт Тоқаевтың «Заң мен тәртіп» қағидатына айрықша мән беретінін, өңірде полиция қызметкерлерінің тынымсыз еңбегі арқасында қоғамдық қауіпсіздік тұрақты деңгейде сақталып келе жатқанын жеткізді. Әкімдік полициямен бірлесе қылмыстың алдын алу, қоғамдық тәртіпті сақтау, азаматтардың құқықтары мен қауіпсіздігін қорғау бағытында нақты нәтижелерге ұмтылатынын айтты.
Жаңа басшыдан аймақ тұрғындарының сенімін ақтап, жүйелі жұмысты жалғастыру күтіледі. Облыс әкімдігі тәртіп сақшыларымен тығыз байланыста еңбек етуге дайын екенін мәлімдеді. Сонымен бірге, Абайдың 180 жылдық мерейтойы кезінде тәртіпті қамтамасыз еткен полиция қызметкерлеріне алғыс білдірілді.
