Semeytany.kz — 23 қыркүйектен бастап «Қарағанды – Семей – Қарағанды» бағыты бойынша субсидияланған әуе рейсі іске қосылды. Қалалар арасында жолаушылар сейсенбі және бейсенбі күндері қатынайды, билет бағасы – 15 000 теңге.
SCAT әуе компаниясы бұл бағытта сыйымдылығы 50 орындық Bombardier CRJ200 ұшағын қолданады. Бағыттың қайта ашылуы тұрғындарға жолды қысқартып, қолжетімді бағада ұшуға мүмкіндік береді. Қарағанды тұрғынының айтуынша, бұрын Семейге жету үшін Астана арқылы пойызбен баруға тура келген, енді шамамен бір жарым сағатта жетуге болады.
Жаңа рейс Қазақстан Республикасы Көлік министрлігінің Азаматтық авиация комитеті мен Абай облысы әкімдігінің қолдауымен іске асырылды. Қазіргі таңда Семей қаласынан «Семей – Алматы», «Семей – Астана», «Семей – Үржар», «Семей – Қарағанды» бағыттары бойынша ұшулар орындалып, қызметті FlyArystan, Оңтүстік аспаны және SCAT компаниялары көрсетуде.
