«AMANAT» партиясы Абай облыстық филиалының ұйымдастыруымен бастауыш партия ұйымдарының әлеуетін арттыруға арналған семинар өткізілді. «Бастауыш партия ұйымдарының қызметін жетілдіру» тақырыбында екі күнге жалғасқан семинар-тренинг барысында облыстың әр өңірінен келген бастауыш партия ұйымдарының төрағалары мен белсенді мүшелері жиналып, жалпы қатысушылар саны 30-дан асты.
Гүлім ЗАМАНБЕКҚЫЗЫ,
«Semey tany»
Семинардың негізгі мақсаты — партияның өңірлік құрылымдарын жаңғырту, бастауыш партия ұйымдарының жұмысын жүйелеу, тиімді басқару дағдыларын қалыптастыру және партиялық әлеуетті арттыру болып табылады. Сонымен бірге, қатысушылар өзара саяси коммуникация, қоғамдық жұмыстарды ұйымдастыру және ақпараттық науқандарды жүргізу тәжірибелерімен бөлісті. Абай облысы бойынша бүгінгі таңда 137 бастауыш партия ұйымы жұмыс істесе, оның ішінде 27 ұйым Семей қаласында орналасқан. Бұл ұйымдар – партияның негізгі қозғаушы күші, халықпен тікелей жұмыс істейтін маңызды құрылымдық буын. Сондықтан олардың қызметін жетілдіру – партияның стратегиялық мақсаттарының бірі болып отыр. Семинар бағдарламасы мазмұнды тақырыптарды қамтыды. Қатысушылар бастауыш партия ұйымдарының қызметін тиімді ұйымдастыру, партиялық жобаларды жүзеге асыру тетіктері, ақпараттық-коммуникациялық технологияларды пайдалану, қоғамдық пікірмен жұмыс істеу және жергілікті мәселелерді талдау жолдарын талқылады. Сондай-ақ, партиялық этика мен тәртіп қағидаларына, әлеуметтік мәселелерді шешудегі бастауыш ұйымдардың рөліне ерекше көңіл бөлінді.
Іс-шараның ашылу салтанатында сөз сөйлеген «AMANAT» партиясы Абай облыстық филиалының төрағасы Айдар Садырбаев бастауыш ұйымдардың қоғамдағы рөліне тоқталды:
– Бастауыш партия ұйымдары – партия мен халық арасындағы алтын көпір. Олардың жұмысы партия саясатының табысты іске асуына тікелей әсер етеді. Бүгінгі семинар – тәжірибе алмасуға, білім жетілдіруге және бастауыш ұйымдарды жаңа деңгейге көтеруге бағытталған маңызды қадам, бізде Семей аумағындағы ауылдарды қамтысақ, басқа аудандарда да дәл солай жұмыс атқарылуда – деді ол.
Семинар барысында қатысушылар практикалық тапсырмалар орындап, топтық тренингтерге қатысты. Осыған дейін партияның ұйымдастыруымен БПҰ арасында республикалық байқау өткен болатын. Онда үздік бастауыш ұйымдардың жұмыс тәжірибесі таныстырылып, өзге ұйымдарға үлгі ретінде ұсынылғандығын да атап өткен жөн. Ал бүгінгі күні ұйымдастырылған екі күндік семинардың қорытындысы бойынша барлық қатысушыларға арнайы сертификаттар табыс етілетін болады. «AMANAT» партиясының өкілдері бұдан кейін де кадрларды дамытуға, бастауыш ұйымдардың әлеуетін арттыруға бағытталған игі іс-шараларды жалғастыруды жоспарлап отырғандықтарын да атап өтті.
