Semeytany.kz — Мақаншы ауылында облыс әкімі Берік Уәли тұрғындарды жеке мәселелері бойынша қабылдап, баспана, жер рәсімдеу, білім беру, денсаулық сақтау және спорт саласына қатысты өтініштерді тыңдады. Сонымен қатар Алакөл туристік аймағын дамыту жөнінде ұсыныстар айтылды.
Кездесу барысында өңір басшысы 20-ға жуық азаматтың өтінішін қарап, аудан әкімі мен жауапты басқармаларға көтерілген өзекті мәселелерді заң аясында шешуді тапсырды. «Қабылдауда көтерілген мәселелердің ешқайсысы назардан тыс қалмайды. Биыл Алакөлдің инфрақұрылымын жаңғыртуға облыстық бюджеттен қаржы бөлінді. Қазір туристік аймақтың бас жоспары әзірленіп жатыр. Бұл бағыттағы жұмысты жүйелі түрде жалғастырамыз», – деді Берік Уәли.
Алакөл туристік аймағы бойынша инфрақұрылымды жаңарту, сервис сапасын арттыру және маусымдық жүктемені теңгерімдеу мәселелері талқыланды. Бас жоспар осы бағыттарды нақтылап, қажетті инженерлік желілер мен қоғамдық кеңістіктерді кезең-кезеңмен дамытуға негіз болады.
Қабылдаудың алдында сала басқармаларының басшылары да азаматтарды жеке сұрақтары бойынша қабылдап, түсініктеме беріп, арыз-өтініштерін тіркеді.
