Semeytany.kz — Абай ауданында «Таза Қазақстан» экологиялық акциясы аясында Саржал ауылында орталық саябақ пайдалануға берілді. Жоба өткен жылы «Үздік ауыл – 2024» байқауында Саржалдың жеңімпаз атанып, 20 млн теңге сертификатын ұтуы нәтижесінде жүзеге асты.
Салтанатты ашылу рәсімі кең көлемде ұйымдастырылып, ауыл жұртына көтеріңкі көңіл-күй сыйлады. Ауыл тұрғындары жиынтық жүлдені инфрақұрылымды жақсартуға бағыттау жөнінде шешім қабылдап, қаражат есебінен саябақ салынды. Іс-шарада Абай ауданының әкімі Мейіржан Серікбосынұлы ауылдарды көркейту – елдің ертеңіне қосылған нақты үлес екенін атап өтіп, белсенді тұрғындарға алғыс білдірді.
Саябақ ауыл орталығында орналасқан, абаттандыру жұмыстары жүргізіліп, демалыс аймағы ретінде қолданысқа берілді. Нысан ауыл ішіндегі қоғамдық кеңістікті жаңартып, тұрғындардың бос уақытын тиімді өткізуге мүмкіндік береді.
Шара барысында «Үздік ауыл – 2025» байқауының қорытындысы да жарияланды. Жеңімпаздар: I орын – Көкбай ауылдық округі (15 млн теңге), II орын – Қасқабұлақ ауылдық округі (10 млн теңге), III орын – Тоқтамыс ауылдық округі (7 млн теңге), III орын – Саржал ауылдық округі (7 млн теңге). Қазіргі таңда жүлделер ауылдарды абаттандыру мен көріктендіруге бағытталмақ.
