Semeytany.kz — Абай облысында «Педагог мәртебесі туралы» заң аясындағы шаралар кешенді түрде орындалып келеді. Бұл жайында өңірлік коммуникациялар қызметінде өткен брифингте облыстық білім басқарма басшысының орынбасары Айжан Құрманова мәлімдеді.
Оның айтуынша, өңірде 12 177 педагог еңбек етеді. Мұғалімдердің 95%-ы жаңартылған біліктілік санатына ие. 2020 жылдан бері еңбекақы кезең-кезеңімен өсіп, қазір 75%-ға артқан. Сынып жетекшілігі, дәптер тексеру және тәлімгерлік үшін қосымша үстемақы төленеді. Ауылдық жерде жұмыс істейтіндерге 25% үстемақы қарастырылған, жалдамалы баспана мен коммуналдық төлемдерге жергілікті бюджеттен көмек беріледі.
Педагог мерейін көтеруге бағытталған нәтижелер де айтылды: 2022 жылдан бері Абай облысының 8 мұғалімі республикалық «Үздік педагог» атағын иеленді. «Жас педагог» бағдарламасы арқылы 780-нен астам жас маман жұмысқа орналасып, тәлімгерлік қолдау алып жүр. 2025 жылдың соңына дейін тағы 4 981 педагог біліктілікті арттыру курстарынан өтетіні жоспарланған.
Абай облысының білім саласында сапаны қамтамасыз ету департаментінің басшысы Бақытгүл Мәсәлімова педагогтердің кәсіби құқықтары заңмен қорғалғанын атап өтті. Мұғалімдер артық есеп-қисап пен заңсыз қоғамдық жұмыстардан босатылған, 56 күндік демалыс, қосымша үстемақылар және әлеуметтік жеңілдіктер алады. Педагог құқығын бұзған тұлғалар ҚР ӘҚБтК-нің 409-бабы бойынша жауапқа тартылады.
Қорытындылай келе, заң талаптарының толық әрі жүйелі орындалуы өңірдегі білім беру сапасын арттыруға, мұғалім мамандығының тартымдылығын күшейтуге және жас кадрлар ағымын тұрақтандыруға елеулі серпін беріп отыр.
