Semeytany.kz – Абай облысында колледж студенттері арасында «Заң мен тәртіп» атты жас ораторлар байқауы ұйымдастырылды. Шараның мақсаты – жастардың құқықтық санасын көтеріп, сыбайлас жемқорлыққа қарсы мәдениетті шешендік өнер арқылы насихаттау.
Байқау Абай облысының ішкі саясат басқармасының тапсырысы негізінде «Тәуелсіз зерттеу орталығы» қоғамдық бірлестігінің ұйымдастыруымен, облыстық білім басқармасы және ҚР Мемлекеттік қызмет істері агенттігінің Абай облысы бойынша департаментінің қолдауымен өтті. Ұйымдастырушылардың айтуынша, қатысушылар жоғары дайындықпен келіп, өз ойларын еркін, дәлелді жеткізе білді. «Адал азамат» ұстанымы аясында жастар «болашақта қандай азамат боламын?» деген сұраққа жауап іздеп, жеке құндылықтары мен бағдарын айқындады, – деді «Тәуелсіз зерттеу орталығының» басшысы Жанар Қабидоллақызы.
Қорытынды бойынша Рымбек Байсейітов атындағы Семей қаржы-экономикалық колледжінің студенті Назерке Кадекова бірінші орын алды. Екінші орын Д. Қалматаев атындағы мемлекеттік жоғары медицина колледжінің студенті Сәрсен Жанеркеге, үшінші орын Көлік колледжінің студенті Дүйсенғазы Ұланға бұйырды. Сонымен бірге жеті студент «Классикалық риторика» номинациясымен марапатталды. Жеңімпаздар мен финалистерге арнайы дипломдар және сыйлықтар табысталды.
Назерке Кадекова мемлекеттік сатып алудағы сыбайлас жемқорлық тақырыбында баяндама жасап, саланың ашықтығы мен адалдығы ел қаржысының тиімділігіне тікелей ықпал ететінін атап өтті. Ұйымдастырушылар мұндай алаңдар жастардың азаматтық ұстанымын нығайтып, қоғамдағы әділдік қағидатын кеңінен таратуға серпін беретінін айтты.
