Semeytany.kz — Абай облысының әкімі Берік Уәли Семейдегі өндіріс нысандарын аралау барысында 2024 жылы құрылған «ArInvest Semey» ЖШС-іне барды. Бұл кәсіпорын жылу желілеріне арналған алдын ала оқшауланған құбырлар шығарады.
Аймақ басшысы зауыттың жұмысымен танысып, мүмкіндіктерін жоғары бағалады. Кәсіпорын өкілдері өнім өткізу бойынша қолдау сұрады. «Кәсіпорын қала ішінде, логистикалық тұрғыдан ыңғайлы жерде орналасқан. Семейдегі құбырларды жаңғырту кезінде осында жасалған құбырды пайдаланып, отандық өндірушіні қолдауымыз қажет. Кәсіпкерлік басқармасына осы бағытта нақты ұсыныстар әзірлеуді тапсырамын», — деді Берік Уәли.
Зауытта полиуретан көбігімен оқшауланған болат құбырлар, әртүрлі фасондық бөлшектер, үштік тармақтар мен өтпелер жасалады. Өнімдер жер үсті және жер асты жылу желілерін тартуға қолданылады. Кәсіпорынның жылдық қуаты — түрлі диаметрдегі 350 мың метр құбыр және шамамен 15 мың қосалқы бөлшек, қазір 35 адам тұрақты жұмыспен қамтылған.
Қазіргі таңда өндіріс тұрақты режимде жұмыс істеп тұр. Облыс әкімінің тапсырмасына сай, Семей қаласының жылу инфрақұрылымын жаңғырту жобаларында жергілікті зауыттың өнімін пайдалану мүмкіндігі қарастырылатын болады.
