Semeitany.kz — Танымал әнші Мөлдір Әуелбекова Threads-парақшасында Димаш Құдайберген туралы пікірін жариялап, әлемдік сахнада қазақ тілін дәріптегені үшін оны ерекше бағалады, деп жазады Skifnews.kz.
Әншінің айтуынша, кей әріптестер «аудитория ТМД-да» дегенді алға тартып, орыс тілін таңдаса, Димаш керісінше өз ана тілін сахнада еркін қолдануымен үлгі көрсетіп жүр. Әуелбекова Димаштың «өзге тілдерді біле тұра, ана тілін ісімен құрметтеуін» атап өтіп, «Димаш — ұлттық мұра» деп түйіндеді.
Еске салайық, 5 қазан күні Димаш Құдайберген Нью-Йорктегі әйгілі Madison Square Garden алаңында жеке концерт берді. Бұл кеште ол халықаралық репертуарымен қатар қазақ тіліндегі шығармаларын да орындап, тыңдарман ықыласына бөленді.
Пост жарияланғаннан кейін әлеуметтік желі қолданушылары Димаштың қазақ тілін насихаттауын қолдап, пікір қалдыруда. Көпшілігі Әуелбекованың үнін құптап, өнерпаздың тілге құрметін жастарға өнеге ретінде атады.
