Semeytany.kz — Абай облысында «Абай облысы – лудоманиясыз аймақ» атты облыстық форум өтті. Шараны облыс әкімдігі мен облыс бойынша экономикалық тергеп-тексеру департаменті бірлесе ұйымдастырды. Мақсат – құмар ойындарының зиянына қарсы қоғамдық иммунитет қалыптастыру, жастарды салауатты өмір салтына баулу және лудоманияның алдын алу жұмыстарын күшейту.
Форум алаңында департамент мамандары тұрғындарға құмар ойындарына қатысты құқықтық және әлеуметтік мәселелер бойынша кеңес берді. Сонымен бірге «Суреттер/плакаттар», «Өлеңдер мен ұрандар, мемдер», «Көркем оқу шеберлері», «Эссе/блог-пост», «Фотобайқау», «Комикстер мен сторибордтар», «Музыкалық байқау» сияқты бірнеше номинацияның жеңімпаздары марапатталды.
Іс-шараға қатысқан облыс әкімі Берік Уәли лудомания тақырыбының өзектілігін атап өтіп, зиянды әдеттің алдын алуға үлес қосып жүрген экономикалық тергеп-тексеру департаментіне алғыс айтты. Аймақ басшысы Президент Қасым-Жомарт Тоқаевтың Ұлттық құрылтайдағы «елдің өсіп-өркендеуіне кедергі болатын жаман әдет, жағымсыз қылық және қауіпті кеселден арылу» туралы үндеуін еске салып, лудоманияның сол бес кеселдің бірі екенін жеткізді. Сондай-ақ, Абайдың «Бес нәрседен қашық бол, бес нәрсеге асық бол» өсиетінің мәніне тоқталып, жобаның жастар санасын дұрыс қалыптастыруға бағытталғанын айтты.
Форум барысында Семей қаласындағы №10 мектептің 2-сынып оқушылары Жанель мен Анель Жиенбековалар белсенділігі үшін арнайы сыйлыққа ие болды. Олар байқау тақырыбына сай бейнеролик дайындаған. Кеш соңында «Дариға-ай» жастар театрының «Шәй ішейікші» атты театрландырылған қойылымы көрсетіліп, Мұқан Төлебаев атындағы музыкалық училище ұжымы мен Әміре Қашаубаев мемлекеттік филармониясы әртістері концерттік бағдарлама ұсынды.
