Semeytany.kz — Облыс әкімі Берік Уәли Alikhan Bokeikhan University базасындағы «Abai IT-Valley» технологиялық кластеріне барып, студенттер мен жас кәсіпкерлердің әзірлемелерімен танысты.
Кездесу барысында аймақ басшысына «Jurek-AI», «OneMed», «Jidek», «I-Track» секілді түрлі салаға арналған 20-ға жуық стартап пен мобильді қосымша таныстырылды. Оның ішінде OneMed – пациент шағымына сай дәрігер мен клиниканы ұсынатын жасанды интеллект-ассистенті бар жазылым қызметі, ал Jidek.kz – жұмыс беруші, оқу орны және жұмыс іздеушіні байланыстыратын қалалық цифрлық еңбек платформасы ретінде сипатталды.
Кластер туралы мәліметке сүйенсек, «Abai IT-Valley» 2022 жылы Цифрлық даму, инновациялар және аэроғарыш өнеркәсібі министрлігі, Astana Hub және ҚР Ұлттық Банкінің қолдауымен университет жанынан құрылған. Үш жылда Python Pro, Java Developer, веб-даму, 3D модельдеу және AI-Builder Lab бағыттары бойынша 100-ден астам түлек оқуын тәмамдаған. Бағдарламалар Tech Orda жобасы аясында сертификатталған, сабақтарды Huawei Talent, Microsoft және Astana Hub мамандары жүргізеді. Huawei Talent шеңберінде студенттер жасанды интеллект, сымсыз байланыс және 5G технологияларын меңгерген. Сонымен қатар AI-SANA жобасы аясында 7500-ден астам студент Search және AI бағыттары бойынша оқытылды. Кластер резиденттері виртуалды 3D зертхана, балабақшаға арналған ұсақ моториканы дамытатын ойыншықтардың 3D модельдері, NFT-кроссовкалар және агромайнинг сияқты жобаларды әзірлеп келеді.
Аймақ басшысына Oner 3D аддитивті технологиялар орталығының да жұмысы таныстырылды. Бұл – өңірдегі техникалық және декоративтік мақсаттағы пластикалық бұйымдарды шығаратын жалғыз кәсіби 3D-баспа орталығы. Заманауи жабдықтар паркінің арқасында идеядан бастап прототип пен дайын өнімге дейін толық цикл іске асырылады. Сондай-ақ «Ro-Alemi» орталығында білім алатын семейлік оқушылар командасы Сингапурда өткен халықаралық жарыста гран-при иеленгені айтылды.
Қорытындысында Берік Уәли «Abai IT-Valley» жұмысына жоғары баға беріп, облыстық цифрлық технологиялар басқармасына бағытты жандандыру бойынша ұсыныстар әзірлеуді тапсырды. «Президент Жолдауында жасанды интеллектке айрықша мән берілді. Облыс үшін қажет стартаптарды жүйелі іске асырып жатқан жастарды қолдаймыз, әкімдік тарапынан жан-жақты қолдау болады», – деді ол.
