Semeytany.kz — Мемлекет басшысы Қасым-Жомарт Тоқаевтың бастамасымен жүзеге асқан «Таза Қазақстан» экологиялық бағдарламасы аясындағы жалпыұлттық акцияға Абай облысының тұрғындары белсенді қатысты.
Өңірдің 10 ауданы мен 2 қаласында 15 мыңға жуық адам сенбілікке шығып, 300 гектар аумақ тазартылды, 1000 тоннаға дейін қоқыс полигондарға жеткізілді. Табиғатты көгалдандыру мақсатында жалпы 5 мың түп ағаш көшеті егілді.
Семей қаласында жалпықалалық сенбілік өтті. Облыс орталығында 1000 түп ағаш отырғызылды. Әуелі Қарағайлы ықшам ауданында салынып жатқан жаңа саябаққа қарағай көшеттері егілді, шараға облыс әкімі Берік Уәли қатысты. Сондай-ақ әуежайға баратын жол бойында 300 түп жасыл желек отырғызылды. Аталған жұмыстарға қала әкімдігі мен мемлекеттік мекемелердің 100-ге жуық қызметкері атсалысты.
Өңірде «Таза Қазақстан» шеңберінде жүйелі жұмыс жүріп жатыр: 44 іс-шарадан тұратын өңірлік жоспар бекітілген. Биылғы санитарлық-экологиялық екі айлыққа 227 мыңнан астам тұрғын, 10 275 ұйым және 4114 техника жұмылдырылды. Тек 27 қыркүйек күні өткен экологиялық сенбіліктің өзінде 10 мыңға жуық адам, 500-ге тарта ұйым қатысып, 1050 тонна тұрмыстық қалдық шығарылды.
Абай облысында 2022–2024 жылдары 213 мыңнан астам ағаш егілді. Биылдың өзінде 57 мыңнан астам жасыл желек отырғызылды. Бағдарлама аясында экологиялық мәдениетті қалыптастыру және табиғатты қорғау бағытындағы шаралар тұрақты түрде жалғасады.
