Semeytany.kz — Көкпекті ауданында Ауған соғысы ардагерлерінің саябағын орталыққа көшіру мәселесі шешімін тапты. Бұған дейін тұрғындар мен ардагерлер бұрынғы орны аудан орталығынан алыс болғандықтан, саябақты қолайлы жерге орналастыруды сұрап келген.
Жаңа орын Жеңіс саябағынан бөлініп, арнайы алаң дайындалды. Мұнда ескерткіш тақта орнатылып, Ауған соғысында ерлікпен қаза тапқан жергілікті азаматтардың есімдері қашалып жазылды. Бұрынғы саябақтың орталық көшеден шамамен 500 метр қашықтығы, әсіресе жыл сайын 15 ақпанда өтетін еске алу іс-шараларында тұрғындарға жету қиындық тудырған еді.
Жаңа саябақ аумағы толық абаттандырылып, жарық шамдары орнатылды. Тұрғындар мен қонақтардың жайлылығы ескерілді. Қазіргі таңда ауданда “Көкпекті аудандық Ауғанстандағы соғыс ардагерлері ұйымы” қоғамдық бірлестігі белсенді жұмыс істеп, патриоттық тәрбие мен естелік шараларын жүйелі түрде жүргізуде.
Бұл бастама – өткенге құрмет, жас ұрпаққа ел тарихын танытып, бейбіт өмірдің құнын ұғындыруға бағытталған маңызды қадам.
