Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте Абай облысында тұрғын үй құрылысының қарқыны мен жоспардың орындалуы талқыланды.
Кеңесте облыстық құрылыс басқармасының басшысы Шыңғыс Риаханов 2025 жылға 348,7 мың шаршы метр тұрғын үйді пайдалануға беру көзделгенін айтты. Әлеуметтік осал санаттағы азаматтарды баспанамен қамту үшін 1146 пәтер сатып алу жоспарланып отыр. Аймақ басшысы салаға жауапты орынбасары Серік Төленбергенов пен Құрылыс басқармасына аудан және қала әкімдіктерімен бірлесіп, құрылыс кестесінің орындалуын күнделікті бақылауды тапсырды.
Семейдің Қарағайлы ықшам ауданында 18 көпқабатты үйдің құрылысы жүріп жатыр, оның төртеуі биыл пайдалануға берілді. Бұған қоса, осы аумақта бой көтеретін 29 несиелік үйдің жобалық-сметалық құжаттамасы әзірленді, ал Семей қаласы әкімдігі инженерлік желілерді тартуға қатысты жобалау-сметалық құжаттаманы дайындауда.
Қорытындылай келе, облыс әкімдігі тұрғын үй құрылысын жоспарға сай жеделдетіп, инженерлік инфрақұрылымды кезең-кезеңімен қамтамасыз етуді көздеп отыр.
