Аягөз бен Баршатас арасындағы жол мәселесі «Семей таңы» газетінің бетінде бұған дейін бірнеше рет көтерілген болатын. Алайда араға біраз уақыт салып бұл тақырыпқа қайта оралуымызға себеп — аягөздік қоғам белсендісі Қайыржан Нұрсипатовтың жолдаған хаты болды. Онда көтерілген жайттар назардан тыс қалдырмайтын маңызды мәселелерді қамтиды.
«2024 жылы Баршатас–Қорық арасындағы жолдың 31 шақырымын жөндеуді тендер арқылы «Гордорстрой» компаниясы жеңіп алған болатын. Былтыр бұл компания жолдың 8 шақырымын ғана орташа жөндеуден өткізді. Биыл қалған бөлігін аяқтады. Сонымен қатар, 2025 жылға Баршатас–Қосағаш бағыты мен Мәдениет ауылының тұсындағы 5-6 шақырым жолды қосқанда, жалпы 14 шақырымды жөндеуге тағы да сол компания тендерді жеңіп алды. Қазіргі таңда жөндеу жұмыстары жүргізілуде,» – делінген хатта.
Алайда, мәселе тек осы жұмыстармен шектелмейді. Қайыржан Нұрсипатовтың айтуынша, «Гордорстрой» компаниясы жөндеу жұмыстарын жүргіземіз деп, негізгі жолды — Аягөз–Баршатас бағытындағы 178 шақырымды тоз-тозын шығарып, мүлде жарамсыз күйге түсірген.
«Ауыр жүк көліктерімен асфальт, қиыршық тас, цемент және басқа да құрылыс материалдарын шамадан тыс тасу салдарынан жолдың сапасы күрт нашарлап кетті. Бұрын бірсыдырғы жақсы жолмен Аягөзге дейін 2,5 сағатта жететін болсақ, бүгінде бұл жолды жүріп өтуге 4,5–5 сағат қажет. Такси жүргізушілері бұл бағытта қызмет көрсетуден бас тартып жатыр,» – дейді автор.
Бұған қоса, бұған дейін жолаушылар тасымалымен айналысқан екі «Газель» көлігіне берілген мемлекеттік субсидияның да тиімділігі төмендеген. Жолдың нашарлауына байланысты жүргізушілердің жетіспеушілігі туындап, бір көлік мүлде тоқтатылған.
Автор хат соңында Шұбартау халқының атынан
«Гордорстрой» компаниясының жауапсыз әрекетін облыстық деңгейде қарауды,
аталған жолдарды қалпына келтіруге республикалық бюджеттен қаражат бөлуді сұрайды.
«Біз елдегі экономикалық жағдайды, бюджет тапшылығын түсінеміз. Бірақ қазіргі мәселе – жол сапасының бұрынғыдан да нашарлап кетуі. Шұбартау өңірінің халқы бұл жолдың зардабын күнделікті көріп отыр,» – деп жаза келіп,- Қайыржан Нұрсипатов,- Абай облысының әкімі Берік Уәлидің іскерлік қадамдарын, Семей қаласы мен облыс көлеміндегі бастамаларын сүйіспеншілікпен атап өтеді. Халық облыс басшысынан оң өзгерістер күтетінін, жол мәселесінің де назардан тыс қалмайтынына үміт білдіреді.
Редакциядан:
Бұл мәселені «Семей таңы» газетінің редакциясы назарға алып, алдағы уақытта осы тақырып бойынша арнайы зерттеу, журналистік талдау жасап, құзырлы органдардың жауабын сұрататын боламыз.
