Semeytany.kz — Семейде алғаш рет тікелей дауыс беру арқылы өткен сайлаудың қорытындысымен қала әкімі болып Әділет Қожанбаев сайланды.
Сайлауда үміткер ретінде төрт азамат тіркелген еді: «Балалар мен жастардың шығармашылық сарайы» КМҚК директоры Қанат Шапатов, «Геодезия, картография және құрылыс» Жоғары колледжінің директоры Қаныш Төлеуов, Абай облысының Көкпекті ауданын басқарған тәжірибелі мемлекеттік қызметші Әділет Қожанбаев және уақытша жұмыссыз ретінде көрсетілген Айболат Бекжасаров (қалалық мәслихат депутаты болғаны туралы мәлімет бар).
Бақылаушылар Қожанбаевты басқару тәжірибесі бар негізгі үміткерлердің бірі деп бағалаған. Сонымен бірге, бұрын Семей әкімі міндетін атқарған Бекжан Бапышевтың кандидаттар тізімінде болмауы күтпеген жайт ретінде айтылды.
Әділет Қожанбаев 1980 жылы туған, сайланғанға дейін Абай облысының Көкпекті ауданының әкімі қызметін атқарған.
Жаңа әкім Абай облысының Көкпекті ауданында туып-өскен.
Қазтұтынуодағының аң-терісі және мех колледжін «Экономика, бухгалтерлік есеп және талдау» мамандығы бойынша тәмамдаған. «Тұран» университетінде «Бухгалтерлік есеп және талдау» және «Құқықтану» мамандықтары бойынша жоғары білім алған. Ресей Федерациясы Президенті жанындағы Халық шаруашылығы және мемлекеттік қызмет академиясында оқып, «Іскерлік әкімшілендіру шебері» (MBA) біліктілігін алған.
Еңбек жолы:
• 2000 жылы еңбек жолын «Крамдсбанк» АҚ Семей филиалының тарату комиссиясында кредиттік қызметкер болып бастаған.
• 2001–2013 жылдары — Алматы қаласындағы «БТА Ипотека» АҚ-да түрлі басшылық қызметтер атқарды (процессинг және кепіл мониторингі бөлімінің басшысы, кредиттік басқарма басшысы, атқарушы директор).
• 2013–2014 жылдары — «Темірбанк» АҚ басқарма төрағасының кеңесшісі, Семей қаласындағы филиал директоры.
• 2014–2021 жылдары — «Қазақстанның тұрғын үй құрылыс жинақ банкі» АҚ-да операциялық департамент директоры, басқарушы директор, басқарма төрағасының орынбасары.
• 2021–2022 жылдары — «Қазақтелеком» АҚ Алматы қаласындағы сервистік фабрика филиалының бас директоры.
• 2022–2024 жылдары — Абай облысының қаржы басқармасының басшысы.
• 2024 жылдың тамызынан бастап 2025 жылдың қазан айына дейін — Көкпекті ауданының әкімі.
Жаңа әкімге қала дамуы, инфрақұрылымды жаңғырту және қоғамдық қызмет сапасын арттыру бағытында жүйелі міндеттер жүктеледі. Қала жұртшылығы сайлау нәтижесінен кейін нақты өзгерістер мен тиімді шешімдер күтеді.
