Semeytany.kz – Семей қаласында «Ақылды қала» бағдарламасы аясында 27 жоба жүзеге асырылып жатыр: 7-і толық аяқталған, 20-сы жоспарлы түрде орындалуда. Бұл туралы Өңірлік коммуникациялар қызметіндегі брифингте Абай облысы цифрлық технологиялар басқармасының басшысы Абзал Серікұлы мәлімдеді.
Спикердің айтуынша, атқарылған жұмыстарға бағдарламалау мектептерінің ашылуы, «109» бірыңғай байланыс орталығы, «Мектеп асханасы» жобасы, ТКШ процестерін автоматтандыру, аймақтық геоақпараттық жүйе және білім беру нысандарындағы қауіпсіздік жүйелерін күшейту кіреді. «109» қызметі мен Iqala платформасы арқылы тұрғын өтініштерін қабылдау, коммуналдық қызметтерді онлайн бақылау жолға қойылған.
Жоспар бойынша 2025 жылдың соңына дейін «Виртуалды дәрігер», «Бірыңғай есептеу орталығы», «My Semey» мобильді қосымшасы және «Белсенді азамат» жобалары толық қолданысқа енгізіледі. 2026–2027 жылдары жол қозғалысын басқару жүйесі, ахуалдық орталық, Семей қаласының цифрлық көшірмесі, сондай-ақ туризм мен спортты цифрландыруға бағытталған бастамалар жүзеге асырылады.
Мемлекет басшысының «Жасанды интеллект дәуіріндегі Қазақстан» Жолдауына сай, өңірдің 2026–2030 жылдарға арналған цифрлық трансформация стратегиясы әзірленіп жатыр. Құжат деректерге негізделген басқару моделіне көшу, жасанды интеллект пен Smart City шешімдерін енгізу, интернет инфрақұрылымды кеңейту және цифрлық экономиканы дамытуға бағытталмақ.
