Semeytany.kz — Мәдениет және ақпарат министрі Аида Балаева қазақ мәдениетінің көрнекті өкілі, «Парасат» және «Отан» ордендерінің иегері, Қазақстан Республикасы Композиторлар одағының мүшесі, профессор Юрий Аравиннің дүниеден озғанын хабарлады. Министр марқұмның отбасына, шәкірттері мен әріптестеріне көңіл айтты.
Аида Балаеваның айтуынша, Юрий Петрович қазақтың дәстүрлі музыкасын кеңінен насихаттап, фольклорлық мұраны жинақтауға арналған көптеген ғылыми-шығармашылық экспедицияларға бастамашы болған. Көне музыкалық туындыларды жаңғыртып, ғылыми жүйеге түсіруге елеулі еңбек сіңірді. Сонымен қатар халық композиторлары мен ақындарының мұрасына арналған телерадио жобаларын дайындап, ұлттық музыка әлемін тыңдарманға жаңа қырынан таныта білді.
Өнер иесі өмірін ұлт мәдениетіне арнап, тұтас бір шығармашылық буынды тәрбиелеген ұлағатты ұстаз ретінде танылды. Оның жарқын бейнесі мен руханиятқа қосқан үлесі халық жадында сақталады.
Юрий Аравин 1941 жылғы 2 сәуірде дүниеге келген. Әкесі Петр Аравин де музыкатанушы болған. Марқұмның топырағы торқа, жатқан жері жайлы болсын.
