Semeytany.kz — Алматыда мерзімді әскери қызметке шақырылған 22 жастағы Нұрасыл Әнуар әскер қатарына қосылғанына бір апта өтпей көз жұмған еді. Бұл оқиға қоғамда үлкен резонанс тудырды.
Нұрасыл туыстарының айтуынша, ол 2025 жылдың 27 қыркүйегінде әскерге аттанған. «Бұл — менің парызым, ер азаматтың міндеті» деп үлкен сеніммен кеткенін жақындары еске алады.
Желіде марқұмның биылғы жылдың 24 ақпанда жазған соңғы хаты тарады. Онда ол әкесіне көлік алып беруді, жүргізуші куәлігін алуды, үйді жөндеп, жаңа телефон сатып алуды мақсат еткен. Бар арман-тілегі — жақындарына көмек беріп, қуанту болған.
Ресми дерек бойынша, сарбаздың өліміне менингококцемия себеп болғаны айтылған. Алайда отбасы бұл нұсқаға күмән келтіреді. «Нұрасыл әскерге дейін де, барған соң да сап-сау, көңілді еді. Таңерден бері баламыздың денесін де көрсете алмай отырмыз. Ол өте мейірімді, өмірге құштар жігіт болатын. Оның қазасы — біздің отбасымыз үшін орны толмас қайғы», — дейді туыстары.
Қайғылы жағдай қоғам назарын аударып, жұртшылық марқұмның отбасына көңіл айтып жатыр.
