Semeytany.kz — Семейде әлеуметтік қорғау жүйесі қызметкерлері күніне арналған салтанатты жиын өтті. Шарада облыс әкімінің орынбасары Мейірлан Раханов мамандарды кәсіби мерекемен құттықтап, өңірдің әлеуметтік дамуына қосқан үлестері үшін алғыс білдірді.
Жиын барысында бірқатар қызметкер Еңбек және халықты әлеуметтік қорғау министрінің Құрмет грамотасымен, «Ерен еңбегі үшін» медалімен және «Әлеуметтік-еңбек саласының үздігі» төсбелгісімен марапатталды. Сонымен бірге «Әлеуметтік қорғау жүйесінің үздік қызметкері» және «Үздік әлеуметтік жоба» республикалық байқауларының өңірлік кезеңінің жеңімпаздары анықталып, естелік сыйлықтар мен сертификаттар табысталды.
Қорытындысында өңір басшылығы әлеуметтік қорғау жүйесі мамандарының қоғамның әл-ауқатын көтерудегі еңбегін ерекше атап өтіп, алдағы уақытта да осы бағыттағы жұмыстарды қолдау жалғасатынын жеткізді.
