Бүгін «Мұғалім Talks» кеңесінің қорытындысы бойынша Партия Төрағасы Ерлан Қошановтың қолдауымен «AMANAT» партиясының Абай облыстық филиалы, Абай облысының білім басқармасы және «Daryn Ustaz» педагогтердің кәсіби біліктілігін арттыру орталығының бірлесуімен «Жасанды интеллект – мұғалімнің көмекшісі ретінде» атты ақпараттық кездесу өтті.
Кездесу офлайн және онлайн форматта өтіп, облыстық филиал төрағасының м.а. Майра Мұрсахан жүргізді. Кездесу барысында білім басқармасы мен әдістемелік орталығының өкілдері қатысып, сондай-ақ «Daryn Ustaz» орталығының маманы Айбат Теміржан курс мазмұны мен маңыздылығына тоқталды.
Оның айтуынша, курс аясында педагогтер сабақ жоспарларын, тестілер мен талдауларды, сондай-ақ БЖБ/ТЖБ құжаттарын жасанды интеллект көмегімен автоматтандыруды үйренеді. Сонымен қатар, икемді оқу форматы мұғалімдерге жұмыс пен білімді ұштастырып, кәсіби шеберлігін арттыруға мүмкіндік береді.
Республика бойынша курсқа қатысқан ұстаздардың ішінен үздік 400 педагог іріктеліп, нәтижесінде Астанада өтетін ПедХакатонға жолдама алады. Ал Хакатон жеңімпаздары атанған 20 педагог Оңтүстік Кореяда тағылымдамадан өту мүмкіндігіне ие болатындығын да айта кеткен жөн. Онлайн курсты сәтті аяқтаған қатысушыларға 80 академиялық сағаттық ресми сертификат табысталады. Бұл құжат педагогтердің аттестациясында жарамды және «ҰСТАЗ» – Педагогтің үздіксіз кәсіби дамуының ұлттық платформасына енгізіледі.
Іс-шара соңында қатысушылар өздерін қызықтырған сұрақтарын қойып, пікір алмасты. Кездесуді қорытындылаған Майра Мұрсахан ұстаздарды заманауи технологияларды тиімді қолдануға, цифрлық сауаттылықты арттыруға және жасанды интеллектті кәсіби тәжірибесіне енгізуге шақырды.
