Semeytany.kz — Бүгін Абай облысының әкімі Берік Уәли белгілі жазушы, драматург, аудармашы, баспагер Роллан Сейсенбаевпен кездесті. Әңгіме барысында өңірдің тарихы мен мәдениеті, әдебиеті мен руханиятына қатысты өзекті мәселелер сөз болды.
Кездесуде қаламгер Абайдың 180 жылдық мерейтойы мазмұнды іс-шаралармен, елге пайдалы нақты істермен жоғары деңгейде аталып өткенін атап өтті. Ол ұлы ақын мұрасын кеңінен насихаттау, Абай әлемін жас ұрпақтың санасына терең сіңіру жөніндегі ой-пікірлерімен бөлісті.
Аймақ басшысы Берік Уәли жазушыға өңірдің мәдениет саласында атқарылған жұмыстар туралы кеңінен айтып берді. Мемлекет басшысы Қасым-Жомарт Тоқаевтың тапсырмасына сәйкес, Абайдың 180 жылдығы тұңғыш рет 10 күндік форматта ұйымдастырылып, осы кезеңде түрлі мәдени-рухани, танымдық, интеллектуалдық іс-шаралар өткізілгенін жеткізді.
Мерейтой аясында Абай ауданында инфрақұрылымды жақсарту бағытында да бірқатар маңызды жобалар жүзеге асырылды. Атап айтқанда, Семей–Қарауыл және Семей–Қайнар бағытындағы автожолдарда орташа жөндеу жұмыстары жүргізілді. Сондай-ақ Бөрілі ауылы мен Жидебайға антенналық діңгектер орнатылып, нәтижесінде Абай ауданы толықтай интернетпен қамтылды.
Сонымен бірге, жуырда облыс әкімдігінің қолдауымен Рим қаласындағы Вилла Грациоли саябағында ұлы ойшыл Абайдың мүсіні (бюсті) орнатылғаны айтылды. Бұл қадам қазақ әдебиеті мен Абай мұрасын халықаралық деңгейде насихаттауға бағытталған маңызды символдық оқиға ретінде бағаланды.
Кездесу соңында облыс әкімі Берік Уәли жазушы Роллан Сейсенбаевтың айтқан ұсыныс-пікірлеріне ерекше мән берілетінін, олар өңірдің мәдениет және руханият саласындағы алдағы жұмыстарды жоспарлау барысында ескерілетінін атап өтті.
