Semeytany.kz — Абай облысында тұтынушылардың құқықтарын қорғау бағытындағы жұмыс жүйелі түрде жалғасуда. Облыс бойынша сауда және тұтынушылардың құқықтарын қорғау департаменті 2025 жылдың басынан бері 800-ден астам азаматқа көмек көрсеткен.
Департамент мамандарының араласуымен тұтынушыларға ақшалай қаражаттары қайтарылып, сапасыз немесе ақауы бар тауарлар ауыстырылған. Өтініштердің негізгі бөлігі бөлшек сауда, тұрмыстық техника және электрондық сауда салаларына қатысты болды.
Мекеме қызметкерлері азаматтардың өтініштерін мұқият қарап, оларға сатушыға жазбаша талап қоюға көмектеседі. Көп жағдайда мәселе сотқа жеткізбей, тараптарды татуластыру арқылы шешіледі. Нәтижесінде 400-ден астам тұтынушы өз шағымын тек жазбаша наразылық білдіру арқылы реттеп, уақытын да, қаражатын да үнемдеген.
Тұтынушылардың құқықтарын қорғау бойынша бұл жұмыс Қазақстан Республикасының «Тұтынушылардың құқықтарын қорғау туралы» Заңының 42-4-бабына сәйкес жүргізіледі. Аталған бапқа сай, тауардың, көрсетілген қызметтің немесе орындалған жұмыстың кемшіліктері анықталған жағдайда тұтынушының сатушыға (дайындаушыға, орындаушыға) жазбаша наразылық білдіруге құқығы бар.
Сонымен қатар, осы баптың 2-тармағында сатушы тұтынушының жазбаша наразылығына оны алған күннен бастап он күн ішінде жауап беруге міндетті екені көрсетілген. Наразылыққа мүлде жауап бермеу немесе заңда белгіленген мерзімде жауап қайтармау – құқық бұзушылық болып саналады. Мұндай жағдайда кәсіпкер Қазақстан Республикасының Әкімшілік құқық бұзушылық туралы Кодексінің 190-бабы 5-бөлігінің 3-тармағына сәйкес әкімшілік жауапкершілікке тартылады.
Абай облысында биылғы жылдың өзінде тұтынушылардың жазбаша наразылығына жауап бермегені үшін 12 кәсіпкерлік субъектісіне әкімшілік жаза қолданылған.
Өткен жылмен салыстырғанда тұтынушылардан түсетін өтініштер саны 18 пайызға артқан. Департамент бұл көрсеткішті халықтың құқықтық сауаттылығының артуымен және мекеме жұмысына деген сенімнің күшеюімен байланыстырады.
Абай облысы бойынша сауда және тұтынушылардың құқықтарын қорғау департаменті азаматтарға егер тұтынушы ретінде құқықтарыңыз бұзылса, сатушыға, дайындаушыға немесе қызмет көрсетушіге міндетті түрде жазбаша наразылық хат тапсыруға толық құқығыңыз бар екенін еске салады. Мұндай жағдайда заң сіздің жағыңызда, ал дауды сотқа жеткізбей шешуге мүмкіндік мол.
