Semeytany.kz — Семей қаласының тұрғыны пәтерін жөндеуді уақытында аяқтамаған жөндеу бригадасына шағымданып, нәтижесінде орындаушы айыппұл төлеп, жұмысты аяқтау туралы ұйғарым алды.
Тұрғын жөндеу бригадасымен (Орындаушымен) 5 500 000 теңгеге шарт жасасқан. Шартта жөндеу жұмыстары нақты мерзімде аяқталуы тиіс екені көрсетілген. Алайда орындаушы өз міндетін дер кезінде орындамаған: жөндеу белгіленген уақытта бітпей қалған, жұмысшылар нысанға сирек келе бастаған.
Тапсырыс беруші бірнеше рет Орындаушыға жүгінген, бірақ нақты нәтиже емес, тек бос уәделер ғана алған.
Қазақстан Республикасының «Тұтынушылардың құқықтарын қорғау туралы» Заңының 34-бабының 1-тармағына сәйкес, орындаушы жұмысты (қызмет көрсетуді) шартта белгіленген мерзімде аяқтауға міндетті. Ал осы Заңның 35-бабының 5-тармағында жұмыс бастау және аяқтау мерзімдерін, сондай-ақ кемшіліктерді жою мерзімдерін бұзғаны үшін, егер шартта өзгеше көрсетілмесе, орындаушы әрбір кешіктірілген күн үшін жұмыс (қызмет) құнының 1 пайызы мөлшерінде тұрақсыздық айыбын төлеуге тиіс екені жазылған.
Мерзімдердің сақталмауына байланысты тапсырыс беруші «E-Өтініш» ақпараттық жүйесі арқылы Абай облысы бойынша сауда және тұтынушылардың құқықтарын қорғау департаментіне жүгінді.
Өтінішті қарау барысында Департамент қызметкері пәтердегі аяқталмаған жөндеу жұмыстарын растайтын қосымша фото және бейнематериалдарды сұратқан. Тапсырыс беруші ұсынған шарт пен дәлелдемелерді зерделегеннен кейін Орындаушыға қатысты жоспардан тыс тексеру тіркелді.
Тексеру нәтижесінде Орындаушының Қазақстан Республикасының «Тұтынушылардың құқықтарын қорғау туралы» Заңының 34-бабы 1-тармағы талаптарын бұзғаны анықталды. Осыған байланысты ол Қазақстан Республикасының Әкімшілік құқық бұзушылық туралы кодексінің 190-бабы 1-бөлігі бойынша әкімшілік жауапкершілікке тартылып, айыппұл салынды.
Сонымен қатар Орындаушыға анықталған бұзушылықтарды жою және жөндеу жұмыстарын нұсқамада көрсетілген мерзімде толық аяқтау жөнінде ұйғарым берілді.
Департамент өкілдері, егер бұл талап орындалмаса, Қазақстан Республикасының Әкімшілік құқық бұзушылық туралы кодексінің 462-бабының 3-тармағы бойынша жауапкершілік қарастырылатынын еске салады. Аталған нормаға сәйкес, мемлекеттік бақылау және қадағалау органдарының заңды талаптарын немесе нұсқамаларын орындамау шағын кәсіпкерлік субъектілері мен коммерциялық емес ұйымдарға 100 айлық есептік көрсеткіш мөлшерінде айыппұл салуға әкеп соғады.
«Біз азаматтарға жөндеу немесе қызмет көрсету туралы шарт жасасар алдында оның барлық талаптарын мұқият оқып шығуды, жұмыс мерзімін және құнын нақты көрсетуді ұсынамыз. Орындаушы өз міндеттемелерін бұзған жағдайда, тұтынушы біздің департаментке «E-Өтініш» ақпараттық жүйесі арқылы немесе Семей қаласы, Абай көшесі, 99 мекенжайы бойынша жүгінуіне болады», – деп атап өтті Абай облысы бойынша сауда және тұтынушылардың құқықтарын қорғау департаментінің өкілі.
