Semeytany.kz — Абай облысының әкімі Берік Уәли Жаңасемей ауданына қарасты Алғабас ауылына жұмыс сапарымен барып, ауызсу жүйесінің жаңартылуы мен білім ошағының жылу қазандығын жаңғырту барысын бақылады.
Алғабас – аудан орталығынан ең шалғай орналасқан елді мекендердің бірі, облыс орталығынан 360 шақырым қашықтықта жатыр. Ауылдағы су құбыры желісі 1974 жылы іске қосылған, ұзындығы 7,5 шақырымды құрайтын, 11 колонкасы бар жүйе болатын. Уақыт өте келе құбырлар әбден тозып, әсіресе қыс мезгілінде жиі апаттық жағдайлар туындаған.
«Ауылды таза ауыз сумен қамту» бағдарламасы аясында 2023 жылдан бастап Алғабаста су құбырларын ауыстыру жұмыстары жүргізіліп, жақында толық аяқталды. Ауыл ішінде 73 сақиналы құдық, 25 гидрант орнатылды. Сонымен бірге Алғабас ауылдық округі әкімдігі мен «Аркс Минералс» ЖШС арасындағы меморандумға сәйкес тыл ардагерлерінің, қарттардың, мүмкіндігі шектеулі жандар мен жалғызбасты зейнеткерлердің үйлеріне су тегін кіргізілді. Нәтижесінде 205 үйге ауызсу құбыры үйге дейін тартылды.
Ауыл ақсақалы Қаңтарбек Файзуллин тұрғындардың ризашылығын білдіріп: «Жеті айда екі рет келіп тұрсыз. Ауыл тұрғындары дән риза. Бұған дейін 50 жыл бұрын салынған су құбырын пайдаланып келдік. Қазан айынан бастап су берілді. Өте қуаныштымыз», – деді.
Сапар барысында облыс әкімі Быхин атындағы жалпы орта білім беретін мектептің қазандығын да көрді. 1974 жылы салынған қазандық қазіргі таңда мектепті, ауылдық әкімшілік ғимаратын, жаңа әкімшілік нысанды, мешітті, қатымхананы және дене шынықтыру-сауықтыру кешенін жылумен қамтамасыз етеді.
Биыл қазандық пештерін ауыстыру үшін аудандық бюджеттен қаржы бөлініп, үш пеш толық жаңартылды, ұзындығы 90 метр болатын жылу трассасы жөнделді. Сонымен қатар қыс мезгілінде жарық өшкен жағдайда жылумен қамтуды тоқтатпау үшін авариялық генератор сатып алынған.
Айта кетейік, биылғы жылдың көктемінде аймақ басшысы шалғайдағы Алғабас ауылына арнайы келіп, қазандықтың жағдайымен танысып, оны жаңарту бойынша қолдау көрсетілетінін айтқан еді.
«Мемлекет басшысының халықты сапалы ауыз сумен қамтамасыз ету жөніндегі тапсырмасын орындау аясында бұл жұмыстар жүзеге асырылды. Уақтылы қаржы бөлініп, мердігер компанияның жұмысы қадағаланды, соның арқасында ауылға таза ауыз су берілді. Көктемде арнайы келгенімде «қазандықты ауыстырамыз» дедік, ол да орындалды. Айтылды – орындалды. Облыстың шалғайдағы ауылдары үнемі бақылауымда болады», – деді Берік Уәли.
