Semeytany.kz — Жаңасемей ауданының Алғабас ауылында дене шынықтыру-сауықтыру кешені ашылып, оның салтанатты рәсіміне Абай облысының әкімі Берік Уәли қатысты.
Салтанатты шарада аймақ басшысы ауыл тұрғындарын жаңа нысанның іске қосылуымен құттықтап, спорт инфрақұрылымын дамытудың өңір үшін маңызын атап өтті. Ол Мемлекет басшысы Қасым-Жомарт Тоқаевтың «Халықтың саулығы – мемлекеттің басты байлығы. Спорт – ұлт денсаулығының негізі» деген сөзін келтіре отырып, бұқаралық спортты өрістету кәсіби спорттың дамуына да, ұлт саулығын нығайтуға да серпін беретінін айтты. Облыс әкімі жаңа кешен ауыл тұрғындарының денсаулығын жақсартуға, балалар мен жастардың спортқа қызығушылығын арттыруға және бос уақытын тиімді өткізуге мүмкіндік беретінін атап өтті.
Алғабас ауылындағы дене шынықтыру-сауықтыру кешені оффтейк келісімі аясында салынған. Құрылысы 2024 жылы басталып, биыл толық аяқталды. Ғимараттың жалпы аумағы 888,5 шаршы метрді құрайды, бір уақытта 110 адамға дейін қабылдай алады. Қазіргі таңда Алғабас ауылында 883 тұрғын бар, оның 210-ы – мектеп оқушылары, ал 9-16 жас аралығындағы балалар саны – 96. Жаңа кешенде волейбол және баскетбол үйірмелерін жүргізетін жаттықтырушылар штатын жасақтау жұмыстары басталды.
Шара барысында облыс әкімі ауылға Газель автокөлігінің кілтін табыстады. Кешеннің ашылуына орай Алғабаста волейболдан жарыс ұйымдастырылып, Берік Уәли спортшылармен кездесіп, оларға сәттілік тіледі.
Бүгінде Абай облысында 610 спорт нысаны жұмыс істейді, спортпен жүйелі түрде шұғылданатын азаматтардың саны жыл сайын артып келеді. 2023 жылы ұлттық құрама сапына 286 спортшы енсе, 2024 жылы бұл көрсеткіш 453-ке, ал биыл 474 спортшыға дейін өскен. Облыс спортшылары соңғы жылдары Азия және әлем чемпионаттарында, Әлем кубогында және көшпенділер ойындарында 276 медаль жеңіп алған.
Соңғы жылдары өңірде спорттық инфрақұрылымды дамытуға ерекше көңіл бөлінуде. 2023 жылдан бері облыс аумағында 10 спорт нысанының құрылысы аяқталып, пайдалануға берілді. Қазіргі уақытта тағы 20 спорт нысанының құрылысы жүріп жатыр. «Туған жерге туыңды тік» инвестициялық форумы аясында Семей қаласы әкімдігі мен «KAZ Minerals» ЖШС арасында 25 мың көрерменге арналған жаңа стадион салу туралы меморандум жасалды. Сонымен қатар «Абайға құрмет» акциясы шеңберінде Павлодар облысы Үстел теннисі орталығын, Атырау облысы Мұз сарайын, ал Ақтөбе облысы Жекпе-жек сарайын салуды жоспарлап отыр.
