Semeytany.kz – Абай облысының әкімі Берік Уәли Семейдегі жаңа «Smart City» ықшамауданына барып, осында бой көтеретін 25 мың орындық стадионның құрылыс барысын көрді.
«Туған жерге туыңды тік» инвестициялық форумы аясында Семей қаласы әкімдігі мен «KAZ Minerals» ЖШС арасында меморандумға қол қойылып, 25 мың көрерменге арналған заманауи стадион салу жоспарланған болатын. Жобаға бөлінген жер аумағы 20 гектарды құрайды. Қазіргі уақытта стадион құрылысын жүргізетін мердігер ұйыммен үшжақты келісімшарт жасалып, аумақ қоршалып, жерді қазу және тегістеу жұмыстары басталып кетті.
Жобада стадион аумағында асфальтбетонды жолдар мен алаңдар салу қарастырылған. Архитектуралық-жоспарлау және инженерлік-құрылымдық шешімдерді әзірлеу кезінде өңірдің табиғи-климаттық және геологиялық ерекшеліктері ескерілген. Жоспар бойынша нысанның құрылысы екі жыл ішінде аяқталмақ.
Облыс әкімі стадионның маңызына тоқталып, жұмыстың қарқынын бәсеңдетпеуді тапсырды.
Берік Уәлидің айтуынша, Семей – қазақ футболының қара шаңырақтарының бірі, қала тұрғындары футболды ерекше жақсы көреді. Сондықтан сыйымдылығы жоғары, заманауи талаптарға сай стадион салу – көптен күткен жоба. Әзірге бұл нысан сыйымдылығы жағынан Астана, Алматы және Ақтөбеден кейінгі төртінші стадион болмақ. Жоба аяқталған соң стадионда УЕФА матчтарын өткізуге мүмкіндік туады, яғни нысан халықаралық стандарттарға сай келеді.
Аймақ басшысы сонымен қатар жаңа ықшамауданда басқа да әлеуметтік нысандардың құрылысы жоспарланып отырғанын атап өтті. Жақын уақытта алғашқы болып Маңғыстау облысы өз жобасының құрылыс жұмысын бастамақ.
Мемлекет басшысы Қасым-Жомарт Тоқаевтың қолдауымен жүріп жатқан «Абайға құрмет» акциясы аясында еліміздің бірнеше өңірі Семейге бір-бір әлеуметтік нысан салып беруге ниет білдірді. Маңғыстау облысы Достық үйінің іргетасын қалап үлгерді. Шымкент қаласы шығармашылық орталығы мен Мәдениет үйін, Түркістан облысы көрме орталығын, Астана қаласы «Келешек» мектебін, Ақтөбе облысы жекпе-жек орталығын, Павлодар облысы үстел теннисі орталығын, Солтүстік Қазақстан облысы рәміздер алаңын, Қызылорда облысы «Анаға тағзым» орталығын, Батыс Қазақстан облысы желілік саябақ салуды, ал Шығыс Қазақстан облысы Ертіс жағалауын абаттандыруды жоспарлап отыр.
