Semeytany.kz – Абай облысының Бесқарағай ауданына қарасты Қоянбай ауылында Tele2 ұялы байланыс операторының 4G интернет желісі қосылды. Бұл жоба өңір елді мекендерін жоғары жылдамдықты интернетпен қамтуға бағытталған жол картасы аясында жүзеге асып отыр. Ауылда арнайы антенна-діңгекті құрылыс салынып, заманауи байланыс жабдықтары орнатылды.
Қоянбай тұрғындары үшін бұл жаңалықтың маңызы зор. Соңғы он жылдан бері интернеттің әлсіздігі әр кездесуде айтылып келген еді. Енді көптен күткен мәселе шешімін тауып, ауыл халқы тұрақты мобильді интернетке қол жеткізді.
Қоянбай – Бесқарағай ауданының Ресей Федерациясымен шекаралас орналасқан елді мекендерінің бірі. Бүгінде мұнда 400-ге жуық адам тұрады. 4G желісінің іске қосылуы білім беру, шағын бизнес жүргізу, мемлекеттік қызметтерді онлайн форматта пайдалану мүмкіндігін кеңейтіп, ауылдың әлеуметтік және ақпараттық тұрғыда ашықтығын арттырады.
Аталған елді мекенде екі ай бұрын «Ауылдық денсаулық сақтауды жаңғырту» бағдарламасы аясында жаңа медициналық пункт пайдалануға берілген болатын. Жаңа интернеттің қосылуы медицина саласында да қашықтан кеңес алу, электронды құжат айналымын жүргізу сияқты қызметтерді тиімді пайдалануға жол ашады.
Жыл соңына дейін Бесқарағай ауданының Морозов орманшылығы мен Башкөл ауылы, Аягөз ауданындағы Емелтау мен Қарағаш, Ақсуат ауданындағы Қызылкесік, Кіндікті және Үштөбе, сондай-ақ Жарма ауданындағы Жарық ауылын да мобильді интернетке қосу жоспарланып отыр.
Жалпы, жыл басынан бері Абай ауданындағы Бөрілі елді мекені мен Жидебай қорығында антенна-діңгек құрылымдары орнатылып, «КаР-Тел» ЖШС (Beeline) операторы тарапынан сапалы интернет қосылды. Бұдан бөлек, облыс бойынша халық аз қоныстанған 26 ауыл «OneWeb» спутниктік технологиясы арқылы секундына 50 Мбит жылдамдықтағы интернетпен қамтамасыз етілді.
