Semeytany.kz – Абай облысының әкімі Берік Уәли «Kazakhstan Silicon Alloys» компаниясының басқарушы директоры Паниграхи Бхакта Кишор бастаған шетелдік делегация өкілдерімен кездесті.
Кездесу барысында Бахрейн Корольдігінің Манама қаласында орналасқан сауда және консалтингтік компанияның өкілдері Семей және Курчатов қалаларында ферросилиций зауытын салу жоспарын таныстырды. Жобаға құйылатын инвестиция көлемі 500 миллион АҚШ долларын құрайды.
Инвесторлар өндірісті іске қосу үшін 100 гектар жер учаскесі мен тиісті инфрақұрылым қажет екенін жеткізді. Айтуларынша, зауыт жұмысы озық экологиялық стандарттарға сай ұйымдастырылады.
Аймақ басшысы өңірдің логистикалық әрі өндірістік әлеуетіне тоқталып, жобаны бірлесе жүзеге асыруға дайын екенін мәлімдеді. Сонымен қатар Курчатов қаласының мүмкіндігі жоғары екенін, Семейде жаңа ықшам аудан құрылысы басталып жатқанын атап өтіп, облыс әкімдігі тарапынан жан-жақты қолдау көрсетілетінін айтты.
Ферросилиций – металлургия саласында кең қолданылатын өнімдердің бірі. Ол болат өндіруде қоспа ретінде пайдаланылып, металдың сапасын арттыруға мүмкіндік береді. Сондықтан мұндай өндіріс өңірдегі өнеркәсіптік тізбекті күшейтіп, жаңа жұмыс орындарының ашылуына ықпал етуі ықтимал.
Қазіргі таңда тараптар жобаны іске асырудың негізгі шарттарын талқылау кезеңінде. Алдағы уақытта жер телімін нақтылау, инфрақұрылым мүмкіндігін бағалау және келіссөздерді нақты құжаттарға көшіру жұмыстары жүргізіледі.
