Semeytany.kz — Жаңа жыл қарсаңында еліміздің өңірлерінде «Ғажайыпқа толы Жаңа жыл!» атты дәстүрлі Президент шыршасы ұйымдастырылып жатыр. Семей қаласында өткен мерекелік шараға Абай облысынан 200 оқушы шақырылды.
Шыршаға 9-13 жас аралығындағы жетім, ата-анасының қамқорлығынсыз қалған, аз қамтылған және көп балалы отбасылардың балалары, ерекше білім беру қажеттіліктері бар оқушылар, сондай-ақ оқу, спорт, шығармашылық және қоғамдық іс-шараларда жетістікке жеткен үздіктер қатысты. Балаларды облыс әкімі Берік Уәли мерекемен құттықтап, Мемлекет басшысы Қасым-Жомарт Тоқаевтың жылы лебізін жеткізді.
Биылғы Президент шыршасы Семейдегі «Арена» спорт кешенінде өтті. Аймақ басшысы бұл мерекені ұйымдастыру мен безендіруге ерекше мән берілгенін, мұндай форматтағы шырша облыста бұрын-соңды өткізілмегенін атап өтті. Сонымен бірге ол балалардың сапалы білім алуына мемлекет тарапынан жасалып жатқан қолдауға тоқталды.
Салтанатты кеш барысында театрландырылған қойылым көрсетіліп, аниматорлар мен балалар шығармашылық ұжымдары өнер көрсетті. Аяз Ата мен Ақшақардың келуі мерекелік көңіл-күйді одан әрі күшейтті.
Шараға қатысқан әр балаға Қазақстан Республикасы Президентінің атынан 120 мың теңгелік сыйлық сертификаты, тәттілер мен ойыншықтар салынған жаңа жылдық себет табысталды. Сонымен қатар Абай облысының бес оқушысы Астанада өткен «Жаңа жыл Республика төрінде» атты президенттік шыршаға қатысқан.
