Эпидемиялық маусымға байланысты Абай облысында вакцинамен басқарылатын инфекцияларға қатысты бақылау және профилактикалық іс-шаралар жүйелі түрде жүргізіліп жатыр. Бұл туралы Өңірлік коммуникациялар қызметі алаңында өткен баспасөз мәслихатында облыстық санитариялық-эпидемиологиялық бақылау департаменті басшысының орынбасары Айгүл Тоқтабаева мәлімдеді.
— Өңірде соңғы жылдарда дифтерия, сіреспе, полиомиелит, қызамық және эпидемиялық паротит аурулары тіркелмеген. Ал көкжөтел бойынша өткен жылы 4 жасқа дейінгі балалар арасында 5 жағдай анықталған. Оның төртеуі – екпеден бас тартуға, біреуі – толық екпе курсын алмауға байланысты болған. Барлық жағдай Семей қаласында тіркелген. 2024 жылмен салыстырғанда көкжөтелге шалдығу көрсеткіші 10,9 есе төмендеген.
Сонымен қатар облыстың бас штаттан тыс инфекционисті Имдат Эфендиевтің мәліметінше, өткен жылы қызылшаның 39 зертханалық расталған жағдайы тіркелген. Ауру жұқтырғандардың 76,9 пайызы – 9 жасқа дейінгі балалар, ал 74,3 пайызы – екпе алмаған немесе екпе алғандығы белгісіз азаматтар. Сондай-ақ вирусты А гепатитімен сырқаттану 3,14 есе төмендеп, 98 жағдайдан 31 жағдайға азайған.
Қызылшаның таралуын болдырмау мақсатында 6 айдан 10 ай 29 күнге дейінгі балаларға қосымша жаппай вакцинация жүргізіліп жатыр. Бұл шаралар әсіресе Аягөз ауданында және Семей қаласында күшейтілген. Ұлттық екпелер күнтізбесіне сәйкес қызылшаға қарсы вакцина 1 және 6 жасында егіледі.
Мамандардың айтуынша, қызылшадан қорғанудың ең тиімді жолы – вакцинация. Ол аурудың таралуын шектеп, ұжымдық иммунитет қалыптастыруға мүмкіндік береді. Осыған байланысты тұрғындарға балалардың екпе алған-алмағанын тексеріп, қажет жағдайда вакцинациядан өтуді және ауру белгілері байқалған кезде медициналық көмекке жедел жүгінуді ұсынады.
