Semeytany.kz — Облыс әкімі Берік Уәлидің төрағалығымен өткен кеңейтілген аппараттық кеңесте агроөнеркәсіптік кешен субъектілерін мемлекеттік қолдау шаралары және әлеуметтік маңызы бар азық-түлік тауарларының бағасын тұрақтандыру бағытындағы жұмыстар пысықталды.
Күн тәртібіндегі мәселелер бойынша ауыл шаруашылығы басқармасының басшысы Ертай Қуанбаев пен кәсіпкерлік және индустриялық-инновациялық даму басқармасының басшысы Айбек Рахымбеков баяндама жасады. Мәліметке сәйкес, 2024 жылы агроөнеркәсіп кешенінің ірі инвестициялық жобаларын қаржыландыру бағдарламасы аясында 11,0 млрд теңге бөлініп, 2025 жылы бұл қаржы 11 жобаға бағытталған. Ал көктемгі дала және күзгі егін жинау жұмыстарын жүргізуге арналған «Кең дала» бағдарламасы арқылы 2025 жылы өңір шаруаларына 9,5 млрд теңгеге 202 несие берілген. 2026 жылға осы бағдарлама бойынша 14,0 млрд теңге көзделіп, қазіргі таңда 4,9 млрд теңгеге 51 несие рәсімделді.
Ауыл шаруашылығы техникасын жаңарту бағытында «ҚазАгроҚаржы» АҚ арқылы 2025 жылы 13,5 млрд теңгеге лизинг беріліп, 592 техника сатып алынған. Биыл лизинг көлемін 16,0 млрд теңгеге дейін ұлғайту жоспарланып отыр. Сонымен қатар, 2025 жылы көктемгі және күзгі дала жұмыстарына 51,2 мың тонна арзандатылған дизель отыны бөлінсе, ағымдағы жылы 52,8 мың тонна дизель отынына 1 171 өтінім қабылданған. Бұл өткен жылмен салыстырғанда 1,6 мың тоннаға көп.
Кеңесте өңірде қой шаруашылығын дамытуға мүмкіндік жоғары екені айтылып, 2026–2030 жылдарға арналған салалық бағдарлама әзірленіп жатқаны жеткізілді. Қаржыландыруды «Игілік» бағдарламасы арқылы іске асыру көзделіп отыр. Аймақ басшысы аудан әкімдеріне «Ауыл аманаты» шеңберінде ауыл шаруашылығы кооперативтерін құруды, машина-трактор паркін жаңартуды жалғастыруды және «Кең дала» бағдарламасы бойынша бөлінген қаражаттың тиімді игерілуін қамтамасыз етуді тапсырды.
Берік Уәли несиелеу мен субсидиялау тетіктерінің дұрыс іске асуы ауыл шаруашылығын дамытуға, өндіріс көлемін арттыруға және азық-түлік қауіпсіздігін нығайтуға тікелей әсер ететінін атап өтті. Оның айтуынша, мемлекеттік қолдау нақты нәтижеге бағытталып, бөлінген қаржы толық әрі мақсатты игерілуі тиіс. Бұл ретте аудан және қала әкімдіктері мен ауыл шаруашылығы басқармасы фермерлермен байланысты күшейтіп, қолдау құралдарының қолжетімділігін арттыруы, инвестициялық жобаларды уақтылы іске асыруы қажет.
Әлеуметтік маңызы бар азық-түлік бағасын тұрақтандыру бойынша да өңірде жүйелі жұмыс жүргізіліп жатқаны айтылды. Жыл басынан бері әлеуметтік маңызы бар тауарлар тізімі 19-дан 31-ге дейін кеңейтіліп, сауда үстемесі 15% деңгейінде шектелген. Қазіргі таңда «Семей» ӘКК» АҚ қарамағында 12 әлеуметтік павильон жұмыс істеп тұр, алдағы уақытта тағы 5 павильон орнату жоспарланған. Облыс әкімі баға мониторингін күшейтіп, заң бұзушылықтарға дер кезінде шара қолдануды, сондай-ақ тұрақтандыру қоры өнімдерін нарыққа белсенді шығаруды және әлеуметтік павильондар санын арттыруды тапсырды.
