Semeytany.kz — 8 наурыз – Халықаралық әйелдер күні қарсаңында Абай облысының әкімі Берік Уәли Семей қаласында тұратын 104 жастағы тыл еңбеккері Бижамал Қаржаубаеваның шаңырағына арнайы барып, мерекемен құттықтады.
Аймақ басшысы ғасыр жасаған ананың хал-жағдайын сұрап, оған ақжарма тілегін жеткізді. Кездесу барысында кейуананың ел басына күн туған шақтағы еңбегі мен өнегелі өмір жолы ерекше аталып өтті.
Бижамал Қаржаубаева 1922 жылдың 1 қаңтарында дүниеге келген. Ұлы Отан соғысы жылдарында тылда еңбек етіп, Жеңіске өз үлесін қосқан. Саналы ғұмырындағы табанды еңбегі үшін Жеңістің 50, 60, 70 және 80 жылдығына арналған мерейтойлық медальдармен марапатталған.
Еңбек жолын 1946 жылы Жарма ауданындағы Михайловка совхозында қойма меңгерушісі болып бастаған. Кейін сатушы, есепші қызметтерін атқарып, Михайловка ауылдық кеңесінде хатшы болып жұмыс істеген.
Бүгінде кейуана 3 баладан 13 немере сүйіп отыр. Қазіргі таңда келіні және немересімен бірге тұрады.
Кездесу кезінде әжей өзінің ұзақ жасауының сырын да бөлісті.
«Жас кезімде көп еңбек еттім. Соғыс жылдары соқамен жер жырттық. Кейін есепші болып жұмыс істедім. Ұзақ жасау адам баласының өзіне байланысты. Ең бастысы, өз ісіне адал, айналасына ниеті таза болуы керек. Ана деп ардақтап, арнайы келіп, құттықтап жатқандарыңа көп рақмет! Еліміз аман, жұртымыз тыныш болсын», – деді Бижамал Қаржаубаева.
Облыс әкімі Берік Уәли кейуананың ғибратты ғұмыры кейінгі буын үшін үлкен үлгі екенін айтты.
«Облысымыздағы ең жасы үлкен әжемізге сәлем беріп, мерекемен құттықтау үшін арнайы келіп отырмын. Қилы заманды бастан өткердіңіз. Балалық, жастық шағыңыз қазақ тарихындағы қиын кезеңдерге тұспа-тұс келді. Соғыс жылдарында талмай еңбек еттіңіз. Одан кейін де ел игілігі жолында қызмет жасадыңыз. Елге сіңірген еңбегіңіз зор, өмір жолыңыз келешек ұрпаққа үлгі. Деніңізге саулық тілеймін», – деді аймақ басшысы.
Осылайша, мереке қарсаңында ғасыр жасаған ананы ардақтау — аға буынға деген құрметтің жарқын көрінісіне айналды.
