Semeytany.kz – Наурыз мейрамы қарсаңында Семей қаласында жаңа қоғамдық көліктер таныстырылып, автобус паркі 32 заманауи автокөлікпен толықты.
Облыс әкімі Берік Уәлидің тапсырмасына сәйкес, өткен жылдан бері шаһардағы жолаушы тасымалдаушылар автопарктерін кезең-кезеңімен жаңарту жұмыстарын жүргізіп келеді. Осы бағытта «Авто Транс Семей» және «Семавтопарк» ЖШС Семейде құрастырылған SKYWELL NJL 6128H, SKYWELL NJL 6108H және DONG FENG BWS6665GA5 маркалы жаңа автобустарды сатып алған.
Жаңа техникалар жолаушылардың қауіпсіздігі мен жайлылығын арттыруға бейімделген. Әр автобустың сыйымдылығы шамамен 100 адамға дейін жетеді. Көліктердің барлығы салқындату жүйесімен жабдықталған. Бұдан бөлек, аз қозғалатын азаматтарға қолайлы жағдай жасау үшін автобустарда реттелетін отырғызу алаңы мен арнайы аппарель қарастырылған.
Жаңа автобустарды көрген аймақ басшысы қоғамдық көлік жүйесін жаңғырту ісі алдағы уақытта да жалғасатынын айтты.
«Наурыз мейрамы қарсаңында қала тұрғындарына жақсы тарту болды деп ойлаймын. Автобустардың барлығы заман талабына сай жабдықталған. Жолаушыларға өте қолайлы. Бұл бағыттағы жұмысты жүйелі түрде жалғастырамыз. Жолаушы тасымалдаушыларға әкімдік тарапынан тиісті қолдау көрсетілетін болады», – деді Берік Уәли.
Семейде қоғамдық көлік саласын жаңарту жұмыстары биыл да жалғасады. Жоспар бойынша қалаға 70-ке жуық жаңа автобус сатып алынбақ. Қазіргі уақытта соның 46-сы алынған. Оның 14-і жыл басынан бері желіге шығып, тұрғындарға қызмет көрсетіп жүр. Өткен жылы да автопаркті жаңарту мақсатында 62 автобус алынған болатын.
Қазір Семей қаласында 43 маршрут жұмыс істейді. Бұл бағыттарға 329 автобус тартылған. Облыс орталығында жолаушы тасымалымен 5 тасымалдаушы айналысады. Қоғамдық көлік паркін жаңарту шаһардың жол-көлік инфрақұрылымын жақсартып, тұрғындардың қауіпсіздігі мен өмір сапасын арттыруға бағытталған.
