Semeytany.kz — Абай облысының әкімі Берік Уәли Аягөз ауданына жұмыс сапары барысында су басу қаупі бар учаскелердегі ахуалды барып көрді. Өңірдегі көктемгі кезеңге дайындық аясында аймақ басшысы жауапты мекемелерге алдын алу шараларын күшейтуді тапсырды.
«Қазгидромет» РМК Абай облысы бойынша филиалының мәліметіне сүйенсек, Ақсуат, Аягөз, Бесқарағай, Бородулиха, Жарма және Көкпекті аудандары су тасқыны қаупі жоғары аймақтардың қатарында тұр. Осыған байланысты облыс әкімі Аягөз қаласындағы «Қуаныш» мөлтек ауданында орналасқан қауіпті учаскелердің бірін арнайы барып тексерді. Бұл аумақта жер асты суының көтерілуі байқалған.
Аймақ басшысы жауапты тұлғаларға тұрғындардың қауіпсіздігін қамтамасыз ету, су жиналуының алдын алу және жағдайды тұрақты бақылауда ұстау жөнінде нақты тапсырмалар берді. Сонымен қатар су ағар жүйелерін үздіксіз тазалап, қажетті техника мен жұмыс күшін толық жұмылдыруды міндеттеді.
Қазір аталған аумақта 2 тиегіш, 2 JCB арнайы техникасы, 2 Shacman жүк көлігі және 13 адамнан құралған жұмыс тобы үздіксіз жұмыс істеп жатыр. Мамандар су ағар арықтарды тазалап, топырақ шығару, арықтарды кеңейту және су бағытын реттеу жұмыстарын жүргізуде. Күн сайын су ағар науалары мен арықтар тазартылып, судың еркін ағуына жағдай жасалуда.
Аягөз ауданы әкімінің міндетін атқарушы Айбек Нұғымаров көктемгі су тасқынының алдын алу мақсатында қалада ауқымды жұмыс атқарылып жатқанын жеткізді. Оның айтуынша, бүгінге дейін қала көшелерінен 32 мың текше метр қар арнайы орындарға шығарылған. Бұдан бөлек, 8,8 шақырым жабдықталған су ағар арық, 12 шақырым жабдықталмаған арық және 85 су өткізгіш құбыр тазартылған.
Қажет болған жағдайда қосымша күш тарту да қарастырылған. Қазіргі таңда «Аягөз-су» мемлекеттік коммуналдық кәсіпорнының 6 су сору техникасы, теміржол мекемесінің 3 техникасы және №13 өрт сөндіру бөлімінің техникасы дайын тұр. Сондай-ақ төтенше жағдайлар бөлімі 5 тонна дизель отыны мен 3 тонна АИ-92 бензин қорын әзірлеп қойған.
Облыс әкімі сапар барысында Аягөз қаласындағы 60 пәтерлі тұрғын үйге де барып, баспанамен қамту бағытындағы жұмыстармен танысты. Аталған үй өткен жылы пайдалануға берілген. Қазір «Отбасы банк» АҚ арқылы пәтерлерді сату жұмыстары жүргізіліп жатыр. Бүгінге дейін 8 пәтердің иелері қоныстанған.
Сонымен қатар бір бөлмелі 2 пәтер, екі бөлмелі 1 пәтер және үш бөлмелі 2 пәтер Аягөз ауданының тұрғын үй қорына берілген. Бұл баспаналар әлеуметтік санаттағы азаматтарды тұрғын үймен қамтамасыз етуге бағытталған.
Аймақ басшысы облыс тұрғындарын баспанамен қамту және көктемгі қауіптің алдын алу бағытындағы жұмыстар алдағы уақытта да жүйелі түрде жалғасатынын атап өтті.
