Semeytany.kz — Мемлекет басшысы Қасым-Жомарт Тоқаев 2026 жылғы 15 наурызда жаңа Конституция жобасы бойынша өтіп жатқан республикалық референдумға қатысып, Астанадағы Оқушылар сарайында орналасқан №51 референдум учаскесінде дауыс берді. Жалпыұлттық дауыс беру дәл осы күнге Президент Жарлығымен белгіленген.
Дауыс беру рәсімінен кейін Президент отандық және шетелдік бұқаралық ақпарат құралдарының өкілдері үшін брифинг өткізіп, бұл күнді ел болашағы үшін айрықша маңызды сәт деп бағалады. Мемлекет басшысы жаңа Конституция азаматтардың құқықтары мен бостандықтарына кепілдік беріп, елдің тұтастығы, тәуелсіздігі мен егемендігін нығайтуға қызмет ететінін айтты.
Сондай-ақ Қасым-Жомарт Тоқаев 1995 жылы қабылданған Конституцияның тарихи рөлін атап өтіп, уақыт талабына сай жаңа Ата заң қабылдау қажеттігі туғанын жеткізді. Президент өз сөзінде жаңа Конституцияның преамбуласы мен бірқатар нормаларын әзірлеуге өзі де қатысқанын мәлімдеді.
Брифинг барысында Мемлекет басшысы конституциялық реформаның негізгі мақсаты мен міндеттеріне, сондай-ақ халықаралық күн тәртібіне қатысты қойылған сауалдарға да жауап берді.
